Bilduma www.korrika.eus webgunean dago eskuragarri, eta ikastetxeetarako unitate sorta osorik on-line lantzeko aukera dago.
AEK/Korrikako eta Ikastolen Elkarteko arduradunek Korrikaren edukiak lantzeko unitate didaktikoen bilduma aurkeztu dute. Ikasmaterialak adinaren arabera sailkatuta daude, Haur Hezkuntzatik Batxilergora. Hainbat berrikuntza dakartzate, baina betiko helburuekin: “euskararen aldeko jarrera zabaldu, euskararen aldeko kontzientzia suspertu, eta erabileran eragitea; eta, nola ez, Korrika ezagutaraztea”, adierazi dute.
Korrikaren azken bi edizioetan bezala, unitate didaktiko hauek modu digitalean argitaratu dira. Era berean, aipatzekoa da ere jarduerak ez direla soilik euskara arloan lantzekoak. Izan ere, hainbat irakasgaitan erabiltzeko pentsatuta daude, Gorputz Hezkuntzan, esaterako.
Unitateak adinaren arabera sailkatuta daude, eta, edizio honetan, izen berriekin datoz: Harro unitatea, 3 eta 6 urte bitartekoentzat; Herri unitatea, 6 eta 9 urte bitartekoentzat; Orro unitatea, 9 eta 12 urte bitartekoentzat; eta Korri unitatea, ikasle nagusientzat 12 eta 18 urte bitartekoak.
Azaldu dutenez, Harro eta Herri unitateetan, ikasgelako arbela digitalean proiektatzea proposatzen da. Orro eta Orri unitateetan, berriz, ikasleek ordenagailu eramangarriak erabil ditzakete webgunean sartzeko”.
Gainera, gida didaktikoak irakasleei ere badaude zuzenduta. Unitate bakoitzari dagokion gida deskargatzeko aukera dago; jarduerak aurrera eramateko argibide guztiak daude bertan.
Iraupenari dagokionez, bi asteko kanpaina egitea proposatu dute. “Hori bai, irakasle bakoitzaren esku geratzen da edukiak denbora luzeagoz erabili edo proposamenak laburtzea”, nabarmendu dute.
Prozedurari dagokionez, “edukiak adin-tarteka banatuta egon arren eta jarduerek nolabaiteko hurrenkera bat badaukate ere, irakasle-taldearen esku geratuko da jarduera guztiak gauzatu ala ez, aukeraketa bat egingo den, beste adin-tarte baterako jardueraren bat egokitu nahi duten… Azken batean, materiala ez da zurruna eta nahieran erabil daiteke”.
Edukiak eta berrikuntzak
Ispilu harrogarria. Goiatz Labandibar idazlearen ipuin batek ematen die lotura jarduerei. Ipuineko protagonistak Nora eta Harri izeneko bi ume dira, eta, edizio honetako leloari (Harro herri) erreferentzia eginda, hainbat gairen inguruan hausnartuko dute ikasleek: lotsari buruz hitz egitea, harro sentitzearen garrantzia… Lur Kortak egin du ipuinaren kontaketa.
Harro, herri, korri! esku-jolasa. Harri, orri, ar jolasa aitzakia gisa hartuta, Irundik Baionara doan ibilbidea osatu beharko dute.
Artelana. Edizio honetako mihiseak, 23. Korrikaren logoaren atzeko hondoak, euskararen eta euskal kulturako erreferentzia pila bat ditu. Ikasleek horiek identifikatu beharko dituzte, antzeko irudiak sortu eta horma-irudi handi bat eraiki.
Omenaldia jarduera. Korrikaren omenduen inguruko lanketa. Iparraldeko lagunek azterketak euskaraz egiteko dituzten arazoez jabetzea da jardueraren helburua, eta Azterketak Euskaraz kolektiboari elkartasun-gutunak bidaltzea proposatzen da. Horrekin lotuta, aurtengo Korrikaren dokumentalaren inguruan zineforum bat egitea ere iradokitzen zaie ikasle helduenei.
Ozto(poz) lasterketa. Korrikak ibilbidean zehar gainditu behar izaten dituen oztopoei erreferentzia egiten die jarduerak. Gorputz Hezkuntzako saioetan, oztopoz beteriko zirkuitu bat gauzatzea proposatzen da bertan.
Plazara dantzara! jarduera ere topatuko dugu. Edizio honetarako Myrian Perezek sortu duen koreografia, alegia.
Korrikahoot jolasak. Korrikaren historia hobeto ezagutzeko.
Bingo musikatua. Hainbat ediziotako kantak ezagutzeko ariketa.
Dagoeneko klasiko bihurtu diren jarduerak ere badaude: petoa, lekukoa, ibilbidea, mezua…