Arratsaldeko 17:00etan antolatzaileek gaia proposatuko dute Elorrioko Arriola antzokian, eta 24 orduren buruan, parte hartzaileek sortutako film laburrak antzokian bertan aurkeztu beharko dituzte.
Multimedia eta ikus-entzunezkoak gustuko dutenei beste aukera bat emateko asmoz, 24 Ordu Digitalean izeneko formula berria jarri zuen abian Elorrioko Arriola antzokiak duela hemeretzi urte. Lehiaketa honetan lanak 24 orduren buruan sortu behar dira: oinarri zehatz batzuetatik abiatutako istorioa asmatu, grabatu, editatu eta esportatu. Esaldi, objektu eta gai zehatz bat agertu beharko dira lanean, baina lehiaketa hasten den momentuan jakingo da zeintzuk izango diren azken hauek; bihar, azaroak 1, arratsaldeko 17:00etan Arriola Antzokian, alegia.
Antolatzaileek zehaztu dutenez, “filmak formatu digitalean aurkeztu beharko dira, .avi (konpresio gabe edo) .mov, ( H264 o MP4): 16:9 formatuan, eta 4:3 formatuan aurkezten bada, banda beltza gehitu beharko zaio. Emisio formatua 16:9 izango da”.
Film laburren proiekzioak azaroaren 2an, 20:00ean, izango dira, Arriola antzokian bertan. Emanaldia amaitu ostean sari banaketa izango da. 700 eurokoa da sari nagusia eta 500 euroko bi sari egongo dira beste bi finalistentzat.
Antolakuntzak lehiaketak hartu duen sona nabarmendu du, “Durangaldetik ez ezik, Euskal Herri osotik etortzen dira zinemazaleak lehiatzera, baina bereziki ondo pasatzera”.
Izena emateko eta informazio gehiagorako, 24ordu@arriolaka.com helbidera idatzi beharko dute interesdunek.