Lau esku-hartzek osatuko dute bihar abiatuko den programa.
Hirian horma-artea lantzeko proiektua da Donostia Apain eta Donostia Kulturaren kultur etxe sareak bultzatzen du. Egitasmoa herritarren partaidetzako Olatu Talka jaialdiaren hamargarren eta azken edizioaren baitan jaio zen. Aurtengo edizioan, Donostia Apainek esku-hartze artistikoak Bidebieta auzora eramango ditu bihartik aurrera.
Martutene, Altza eta Loiola auzoek aldez aurretik egin zuten bezala, istorioak eta balioak transmititzeko bide estetiko bat aurkituko du Bidebietak horma-artean. Donostia Kulturk azaldu duenez, “etengabe eboluzionatzen ari den arte-proiektua denez, edizio bakoitzean espazio- eta denbora-mugak gainditzen ditu. Sarritan baimenak lortzeko errazak ez diren kokalekuen hautaketan islatzen da malgutasun hori; izan ere, gizarte- edo hiri-intereseko lekuak dira, ikuspena eta aitortza bermatzeko. Horien barruan sartzen dira kaleetan dauden fatxadak edota horma pribatu eta publikoak”.
Bidebietaren kokapen bereizgarria, Ulia mendiak babestua eta Pasaia ekialdearekin mugan, etengabe eboluzionatzen ari den hiriaren arimaren isla da. Ekimen honen bidez, Donostian bizitasun handiko auzoa dela nabarmendu nahi dute antolatzaileek.
Intxaurrondo Kultur Etxetik koordinatzen dira esku-hartzeak eta lanen antolaketa, eta artistak aukeratzeko Zaldi Urdinaren aholkularitza artistikoa jarraitu da. Ekitaldi honek tokiko nortasunarekiko aitortza sortzailea eta arteak espazio publikoan duen inpaktu eraldatzailearen testigantza bizia izan nahi du.
Horretarako, lau esku-hartze planifikatu dira, eta guztiak garrantzitsuak izanik, esanguratsua da Kontadores eraikinean egingo dena. Kiroldegian, frontoian eta fatxada pribatu batean egingo dira beste hiru esku-hartzeak. Jarduera horiek irailaren 15ean hasi eta urria baino lehen amaituko dira.
Hala, “Bidebieta lau artista nabarmenduen parte-hartzearekin aberastuko da, eta bakoitzak bere ikuspegi bakarra eta sortzailea emango dio auzoko espazio enblematiko horien eraldaketari”.
Zësar Bahamonte, Sevillan jaiotako artistak emango dio bizitza berria Kontadores eraikinari. Sandra Garayoa artista euskaldunak, bere aldetik, kiroldegira eramango ditu bere sormena eta ikuspegi artistikoa. Cestola kooperatibak muralak egiten, pinturan eta ilustrazioan duen esperientzia ekarriko du frontoira. Azkenik, Zebrak kolektiboak auzoko fatxada pribatu batean utziko du bere arrastoa, arteak gizartean duen eginkizunari buruzko elkarrizketa eta hausnarketa desafiatzen eta funtsik gabe uzten saiatuko den esku-hartze batekin.