Donostiako Dferia edo Leioa bezalako arte eszenikoetako azoka publikoetan euskarak duen presentzia urriaz hitz egingo dute kaleko arteetako hainbat eragilek. Euskal Herriko programatzaile eta kultur teknikarien ehuneko handi batek ez du ezagutzen euskaraz zer sortzen den, are gutxiago euskara hutsez zer sortzen den.
Gaur abiatuko den Leioako Umore Azokaren baitan, Kaleko emanaldien hizkuntzen erabilera izeneko solasaldi irekia antolatu du Artekale elkarteak gaur, arratsaldeko 16:00etatik 17:00etara bitartean, Kultur Leioan. Bertan, kaleko arteetako eragileen arteko elkarrizketa izango da.
Antolatzaileek adierazi dutenez, “euskara desagertua dago Dferia edo Leioa bezalako arte eszenikoetako azoka publikoetatik edo, kasurik onenean, egoera bazterrekoan. Bien artean, Euskal Herriko programatzaile eta kultur teknikarien ehuneko handi batek ez du ezagutzen euskaraz zer sortzen den, are gutxiago euskara hutsez zer sortzen den. Zer gogoeta egin genezake eragile ezberdinek horren inguruan, zer neurri hartu?”. Norabide horretan elkarrekin egindako pausu guztiak garrantzitsuak direla diote.
Solasaldian parte hartuko dute Koldo Arakistainek moderatzaile lanetan (Berdinki Zirkua), Pedro Ormazabal programatzaileak (Kalealdi), Mikel Ayllon sortzaileak, (Piszifaktoria ideien laborategia), Eneritz Artetxe antzerkigileak (EHAZE), Teresa Sala banatzaileak, Izar Mendiguren kazetariak (Argia aldizkaria) eta Aitziber Atorrasagastik (Eusko Jaurlaritza).