Berritutako kulunkaulkiak, zepoak eta metalezko beste tresna batzuk biltzen ditu erakusketak. Apirilaren 13ra arte bisitatu ahal izango da.
Bederatzi urteren ondoren, Floren Fernandez de Retana Lobo, Erretan, (Lizarra,1954an) Iruñeko Ziudadelara itzuli da Korintoko Brontzea izeneko erakusketarekin. Oraingoan, berritutako kulunkaulkiak, zepoak eta metalezko beste tresna batzuk jarri ditu ikusgai artistak, berrerabiltzea eta birziklatzea oinarri hartuta. Nafarrak bere hausnarketa sortzaileak eta sinbologia islatzen ditu materialetan, eta garai bateko metal-artisautza ekartzen du gogora.
Azaldu duenez, “kulunkaulkiek kuluxkarako, logurarako eta lo ahulerako joera pizten dute, eta digestioak eragiten dituen amets urgenteetan amesgaiztoak sartu ohi dira”. Kulunkaulkiak 2022an, Ukrainako gatazkarekin, sortu zituen Erretanek, eta ikusleengan baretasunetik lazgarrikeriara doan hari finari buruzko hausnarketa pizten du: “kulunkaulki batean esertzeak sortzen duen atsedena, burdinezko hari baten aurrean, hain zuzen ere ziridun alanbre-hari baten aurrean, metonimia lazgarri batean minez iraulkatzen dena”.
Zepoak iritsi ziren ondoren: “lehenbizi tranpak izan ziren; gero, zaharkinak, eta azkenik, amesgaiztoak. Ehiza larriko zepo baten irribarre maltzurra ikusita, zaila da pentsatzea burdineria horiek aurpegi bihur daitezkeenik, baldin eta hori ez bada borreroarena, edo agian biktimarena. Zepoak eta kulunkaulkiak galdatuta daude, eta hozkada bilakatutako irribarre bat islatzen dute galdatu bitartean emandako kolpeen metafora artistiko gisa”, azaldu dute antolatzaileek.
Lizarrako artistak beste bi erakusketa paratu ditu Ziudadelan: bata 1997an, eta bestea 2016an. Azken erakusketa duela hamar urte jarri zuen ikusgai, Eskulturak. Gudariak. Pinturak izenburupean. 38 artelan jarri zituen ikusgai, eskultura, pintura eta dibond gaineko argazkiak uztartuta.