Urriaren 19an izango da aurtengo jaia, Atarrabian.
Aurtengo Nafarroa Oinezeko kanta eta bideoklipa aurkeztu dituzte gaur, Nafarroako Ikastolen egoitzan. Paz de Ziganda Ikastolako ikasle ohia den Igor Martinezek sortu du musika. Hitzak, berriz, Estitxu Arozena bertsolariak idatzi ditu.
Martinezen hitzetan, “Oinez jaiak duen bizitasuna eta indarra aldarrikatu nahi izan dugu abiadura eta erritmo biziekin, soinu tradizionalekin batera uztartuz. Era berean, ikastolaren motorra den auzolanari dagokion garrantzia eman nahi izan diogu. Horregatik, abestiaren grabazioan 60 pertsona baino gehiagok hartu dute parte”.
Kolaboratzaileen artean Paz de Ziganda Ikastolako ikasle, ikasle ohi, irakasle zein gurasoak daude. Anne Lukin (ikasle ohia), Maite Txurruka (ikasle ohia eta irakaslea), Motxila 21eko kide diren Ainhoa Lizarraga eta Andoni Zilbeti (ikasle ohiak), Ionan Peñalver (ikasle ohia), Julen Leuza (ikasle ohia) Hutsun Txalaparta (Mikel Urrutia eta Anai Gambra, ikasle ohiak), Paz de Ziganda Ikastolako abesbatza eta Paz de Ziganda Helduen Abesbatza dira horren adibide. Hauekin batera, Eñaut Elorrieta, Pirritx, Porrotx eta Marimotots, Claudia Rodriguez (Goxua’n Salsa), Imanol Viñaras (Raimundo el Canastero) eta Oihana Fernandez (Afu) abeslari eta musikariek hartu dute parte. Gainontzeko musikariei dagokienez, Goxua’n Salsa taldeko haizeak, Jorge Sanchez gitarra-jotzailea eta Xanti Etxeberria baxu-jotzailea izan ditugu lagun.
Bideoklipa ere abestiaren ildo beretik sortu da. Paz de Ziganda Ikastolako ikasle ohia den Diego Azanza arduratu da sorkuntzaz eta edizioaz. Honetan, “elkartasuna eta auzolana dira nagusi”, antolatzaileen esanetan, eta “ikastolak sortzen duen komunitate erraldoia islatu eta sustatzen da”.
Bideoklipean ikastolako ikasle, ikasle ohi, irakasle eta gurasoak agertzen dira eta Paz de Ziganda Ikastola ez ezik, haren hazkundearen lekuko izan den herria ere agertzen da: Atarrabia. “Gu ere herria garelako, Atarrabiako hainbat txoko esanguratsutan grabatu dugu, hala nola, Ezkaba txiki mendian eta Arreko Trinitateko zubian. Abestiaren letran aipatzen diren Sugaar, Mikelats, Mari eta Atarrabi, Atarrabiako inauterietako pertsonaia mitologikoak, alegia, azken leku zoragarri honetan agertzen dira, Motxila 21 taldearekin batera. Bideoklipa oso bizia eta koloretsua izatea nahi genuen, Nafarroa Oinez jaiak duen giroaren kutsua izan zezan”, nabarmendu dute.
Buruz egin dute, helburu argi batekin, “auzolana aldarrikatuz eta haur, gazte eta helduak dantzarazteko asmoz. Bihotzez egin dugu, euskara eta Atarrabia herria erdigunean jarriz. Eta azkenik, oinez egin dugu, abiadura biziz aurrera eginez, baina gure iragana eta erroak ahaztu gabe”.
Estitxu Arozena bertsolariak, bere aldetik, historia eta kondaira, mundua eta ingurua, etorkizunaren ziurgabetasuna eta besta uztartu nahi izan ditu kantaren letran, “Atarrabiren mitoa, geografia, Paz de Ziganda pertsona eta ikastolaren ekarpen historikoa esplizituki azpimarratzearekin iritsiko gara gure hizkuntza geroratzeko aukerazkoa dirudien bide bakar posiblera: Euskara edo ez gara”, azpimarratu du lesakarrak.