Diziplina anitzeko egitarau bizi batekin dator laugarren edizioa, musika, dantza, antzerkia eta esperientzia digitalak uztartuz.
Marea Gora lelopean, Loraldia Plaza Zaratamo-Arrigorriaga jaialdiaren laugarren edizioa egingo dute 18tik 27ra bitartean, Bilboko Loraldia festibalaren esperientzia beste herri batzuetara hurbiltzeko asmoz.
Gabriel Arestik amestutako “itsaso urdin eta zabal” horri keinu eginez, jaialdia Bizkaiko bi udalerri horietan errotutako ezinbesteko hitzordu gisa finkatu da, sormen garaikidearen epizentro bihurtuz.
Aurtengo edizioarekin, Loraldia Plaza Zaratamo-Arrigorriaga estrategia sendo baten erakusle izango dela diote antolatzaileek: euskarazko sorkuntza artistikoa zabaldu eta kultur transmisioa aktiboki sustatzea. “Jaialdia erabat finkatuta dagoen honetan, gure balio nagusietako bat diziplina ezberdinen arteko fusioa da, publikoari esperientzia bakarrak eta berritzaileak eskainiz. Era berean, programazioak zubiak eraikitzen ditu belaunaldien artean, ibilbide luzeko artistak eta talentu berriak agertoki berean elkartuz. Batasun honek gure kulturaren iragana ohoratzen du, oraina ospatzen du eta, batez ere, etorkizun sortzaile eta bizi bat bermatzen du”.
Ekimenaren laugarren edizioa izateak proiektuak aspaldi utzi ziola esperimentu izateari erakusten du, eta “gaur egun eredu finkatu eta arrakastatsua da kultura deszentralizatzeko eta herriak euskarazko sormenarekin biziberritzeko”, adierazi dute.
Testuinguru horretan, Marea Gora ez da marketin lelo bat soilik; adierazpen sendo bat da. “Euskal kulturaren bizitasunaren, erresilientziaren eta garai berrietara egokitzeko gaitasunaren metafora da. Gure sorkuntzak, testuinguru global eta homogeneo baten aurrean, bere nortasuna eta indarra aldarrikatzen ditu. Jaialdi hau aldarrikapen horren ospakizun bat da, itsaso zabal eta anitz bat garela erakusten duena”.
Bi herri, sei egun, zazpi ekintza
Aurtengo edizioak denetariko publikoarentzat diseinatutako egitarau oparoa dakar, non tradizioa eta abangoardia elkarren eskutik doazen.
Musika eta memoria izango dira ardatz nagusietako bat. Batetik, Itoiz Udako Sesioak dokumentalaren emanaldiarekin euskal musikaren historiaren mugarri bat gogoratuko dute, Juan Carlos Perez taldeko liderrarekin solasaldi bat barne. Bestetik, Ruper Ordorikak bere lanik intimistena aurkeztuko du Bakarka II kontzertu akustikoaren bidez.
Dantzak eta fusioak ere muga artistikoak gaindituko dituzte. Meñakoz Dantza Taldeak suaren inguruan eraikitako ikuskizun zirraragarria eskainiko du. Eta Arima proposamenak flamenkoaren grina eta txalapartaren erritmo sendoa batuko ditu, kulturarteko elkarrizketa hunkigarri batean.
Antzerki eta berrikuntzetarako lekua ere izango da jaialdia. Agertokian Ai gure juaneteak lanean Mikel Laboaren unibertsoa berrinterpretatuko da ikuspegi garaikide batetik. Gainera, “kalera aterako gara Hitzaurrea esperientzia digitalarekin: parte-hartzaileek, mugikorra eta entzungailuak erabiliz, bi herri hauetako kaleetan barrena ibilbide interaktibo eta poetiko batean murgilduko dira”.
Jaialdiari amaiera emateko, zentzumenak piztuko dituen ekitaldi berezi bat antolatu dute: “Morau eta Beñardo Goietxe musikarien doinuek bat egingo dute El Mozo Wines upategiko ardoen dastaketarekin. Kultura, lurra eta gozamena elkartuko dituen topaketa izango da”.
Egitarau osoa, hemen.