Egitaraua zortzi hitzaldiz eta erakusketa kolektibo batez osatuta egongo da. Topaketaren bidez, euskal argazkigintza garaikidea sustatu eta balioetsi nahi du antolakuntzak.
Argazkilaritzaren aldeko apustua egiteko eta tokiko talentuari balioa emateko asmoz, Aretxabaletako udalak Argazkia.eus Euskal Herriko argazki topaketaren hirugarren edizioa antolatu du maiatzaren 9an, Arkupe kultur etxean.
Antolatzaileek zehaztu dutenez, 500 euroko zortzi sari banatuko dira hautatuak izan diren Aretxabaleta, Gipuzkoa, Nafarroa, Araba, Bizkaia, Lapurdi, Nafarroa Beherea eta Zuberoako argazkilarien artean. Hala, Euskal Herrian jaio edota bizi diren argazkilariek 2026ko apirilaren 12ra arteko epea izango dute euren lanak aurkezteko.
Gainera, 500 euroko saria eskuratzeaz gain, beren lana jendaurrean aurkezteko aukera izango dute Aretxabaletako Arkupe Kultur Etxeko auditorioan, eta maiatzean argazki erakusketa kolektibo batean parte hartzeko aukera ere izango dute. Beraz, maiatzaren 9an, larunbata, “pertsona horiek agertokira igoko dira beren argazki proiektua ezagutzera ematera, eta beren lana ikusgarri egongo da maiatzean zehar”, zehaztu dute.
Topaketan parte hartu ahal izateko, interesdunek 2026ko apirilaren 12a baino lehen karpeta bat aurkeztu beharko dute. Karpeta horretan honako hau jasoko da:
argazki-proiektuaren azalpenak dituen PDF bat, beste PDF bat curriculum artistikoarekin, NANaren kopia bat edo jaioterria eta/edo bizilekua Euskal Herrian duela ziurtatzen duen agiria, eta, guztira, proiektuaren 20 irudi solte (JPG 1920px formatuan, alderik luzeenean eta 72ppp).
Konprimatu ondoren, karpeta hori argazkia.eus@gmail.com helbidera bidali beharko da WeTransfer bidez.
Euskal Herriko lehen argazki topaketaren irabazleen izenak 2026ko apirilaren 20an jakinaraziko dira.
Beren proposamena bidaltzean, parte-hartzaileek konpromisoa hartuko dute maiatzaren 9an, larunbata, topaketara bertaratzeko, eta beren lana hitzaldi baten bidez jendaurrean aurkezteko. Baita erakusketa kolektiboan parte hartzeko ere , beren lana aukeratua izan bada.