Errenteriako idazlearen lehen eleberria da Arranoaren luma eta XIX. mendeko Zuberoako landa eremuan girotuta dago. Izan ere, egilea Alozeko ikastola batean aritu zen lanean hainbat urtez eta bertako esperientziak arrastoa utzi zion.
Idoia Fraile idazleak Arranoaren luma eleberria kaleratu du Elkar argitaletxearen eskutik. 19garren mendeko Zuberoako landa eremuan girotutako eleberri honek irakurlea paisaia, hizkera eta ohitura biziz jositako mundu batera eramaten du. Istorioa 1836. urtean abiatzen du eta emakumearen kontrako bortizkeria du hizpide.
Errenteriarraren lehen eleberriak emakumearen bakardadeaz, sutondoan tokia egiteko zailtasunaz, nork bere bidea topatu eta eraikitzeak duen garrantziaz eta denboraren ihesaz dihardu, dramaren gordintasunaren eta iruditeria aberatsaren arteko oreka hunkigarrian.
Idoia Fraile Ugaldek (Errenteria, 1967) une berean egin zituen magisteritza eta filologia ikasketak eta geroztik, haurrek ipuinaren bidez errealitatea ulertzeko duten gaitasunak txundituta, bi munduak uztarri berean lotuta ekin izan dio irakasle zereginari.
Gipuzkoarrak Seaskako ikastoletan egin zituen bere lehen urteak, baina bereziki Alozeko esperientziak arrastoa baino zerbait gehiago ere utzi zion eta horrek eraman du orain, Arranoaren Luma eleberriko istorioa Zuberoan kokatzera.
Egun Lezo herri eskolan haur hezkuntzako haurrekin lan egiten du. Idazle gisa helduentzat narrazioak idatziz urratu zuen bere bidea.