Legorretako aktoreak lau hamarkadatik gorako ibilbidea egina du Euskal Herriko antzerkian, zineman eta telebistan, eta iaz Zilarrezko Maskorra eta Goya saria eskuratu zituen Maspalomas filmagatik.
Jose Ramon Soroiz izango da aurtengo Zinemira sariaren irabazlea. Donostiako Zinemaldiak eta EPE-IBAIA ekoizle-elkarteak euskal zinemagintzaren ibilbide nabarmena aitortzeko ematen duten ohorezko saria irailaren 22an jasoko du aktoreak, Victoria Eugenia antzokian egingo den Euskal Zinemaren Gala Handian.
Legorretan 1951n jaioa, Soroiz euskal antzezpenaren aurpegi ezagunenetako bat da. Lau hamarkada baino gehiagotan, Euskal Herriko antzerkiaren, zinemaren eta ikus-entzunezkoen bilakaera bizi izan du, eta hiru esparru horietan utzi du arrastoa. Hala ere, oholtza izan du betidanik bere jardunaren ardatz nagusi.
1970eko eta 1980ko hamarkadetan, Euskal Herriko arte eszenikoen profesionalizazioan aitzindari izan ziren hainbat antzerki-konpainiatan aritu zen, eta gaur egun ere antzerkian jarraitzen du. Telebistak, ordea, etxe askotara eraman zuen haren aurpegia, bereziki ETBren sorrerarekin eta garapenarekin batera. Bi eta Bat telesailean Joselontxo interpretatu zuen; Jaun ta Jaben, Joxean Arizkorreta lehendakaria; eta Martinen, Martin Manterola. Hiru serie horiek euskal telebistaren iruditeria kolektiboan lekua egin zuten, eta Soroiz hainbat belaunaldiren ezagun bihurtu zen.
Azken urteotan ere ETBko fikzioan aritu da, besteak beste Irabazi arte! eta Altsasu telesailetan.
Zineman, berriz, 1990eko hamarkadaren hasieran euskarazko zinemagintzak bizi izan zuen loraldiaren parte izan zen. Koldo Izagirreren Offeko maitasuna (1992) eta Eneko Olasagastiren eta Carlos Zabalaren Maité (1994) filmetan parte hartu zuen, eta Julio Medemen Vacas (1992) filmak ikusgarritasun handiagoa eman zion. Gerora, euskarazko zinemaren azken urteotako berpizkundean ere presentzia izan du, Loreak (2014), Amama (2015) eta Maspalomas (2025) filmetan egindako lanekin.
Azken horrek, gainera, Soroizen ibilbideari nazioarteko oihartzuna eta mugez gaindiko aitortza ekarri dio. Aitor Arregik eta Jose Mari Goenagak zuzendutako Maspalomas filmak Donostiako Zinemaldiko Aktore Onenaren Zilarrezko Maskorra eta Goya saria eman zizkion.
Zinemira saria Donostia Zinemaldiak eta EPE-IBAIak euskal zinemagintzaren alorrean ibilbide nabarmena egin duen pertsona edo ekimen bat aitortzeko ematen dute. Soroizen aurretik, besteak beste, Imanol Uribek, Alex Angulok, Karmele Solerrek, Ramon Bareak, Ramon Agirrek, Julia Juanizek, Elena Iruretak eta Telmo Esnalek eta Asier Altunak jaso dute saria.
