Ekimena irailaren 19an jarriko da berriro martxan, larunbatez, Magialdiarekin lankidetzan prestatutako ikuskizun batekin.
Magia, dantza, soinua eta gorputzaren bidezko esperientziak izango dira familientzako Artium Museoko amarauna programaren protagonistak datozen hilabeteetan. Euskal Herriko Arte Garaikidearen Museoak hilean behin proposatzen du hitzordua, arte garaikideko hizkuntza eta esperientzia desberdinak familiei gerturatzeko, eta irailetik abendura bitartean lau saio izango ditu.
Udazkeneko programazioa Bruno Tarnecci magoaren Oroitzapenak eta naufragioak ikuskizunarekin hasiko da, irailaren 19an, 17:00etan. Magialdia jaialdiarekin elkarlanean antolatu dute saioa, eta magoak umorea, misterioa eta sentsibilitatea uztartuko ditu oroitzapenak, galerak eta bizitzako “naufragio txikiak” eszenara eramateko.
Urriaren 17an, berriz, Oihana Altubek Salseo dantza-proposamena eramango du Artiumera, 17:00etan. Parte-hartze jarduera izango da, euskaraz eta gaztelaniaz, eta taldean dantzatzearen alderdi bizienetatik abiatuko da. 4 urtetik gorako haurrentzat izango da, heldu batek lagunduta.
Azaroaren 21ean, Pompa kolektiboaren Siesta eta festa iritsiko da. Esperientzia sentsorial kolektiboak kontzienteki entzutea, besteei arreta eskaintzea eta gelditasunetik gorputzaren presentziaz gozatzea proposatuko du. Mara Sanniak eta Irene Aguilerak osatzen dute kolektiboa eta bitartekaritza kulturalerako tresnak lantzen dituzte sorkuntza- eta ekoizpen-prozesuetan, erritmo geldo eta kontzienteen bidez. Saioa gaztelaniaz izango da eta 4 urtetik gorakoentzat dago zuzenduta.
Urteko azken hitzordua abenduaren 19an izango da, Tunipaneak, Jonathan Garcia Lana ikertzaile eta luthier esperimentalak, Baztertutako objektuen ahotsa aurkeztuta. Kontzertu parte-hartzaile honetan zientzia, musika eta hainbat kulturatako soinu-adierazpenak elkartuko dira, zuzeneko esperimentuen eta publikoaren parte-hartzearen bidez. 6 urtetik aurrerako haurrentzat izango da, eta euskaraz zein gaztelaniaz egingo da.
Horrela, amarauna programak lau hilabetez arte garaikidera hurbiltzeko modu desberdinak proposatuko ditu: ilusionismotik dantzara, esperientzia sentsorialetik musika esperimentalera. Saio guztiak doakoak izango dira, baina edukiera mugatua dute. Horregatik, aldez aurretik izena ematea gomendatzen da, 945 20 90 20 telefonora deituta. Erreserbak jarduera hasi baino hamar minutu lehenagora arte mantenduko dira.
