Maite Larburu (argazkia: Donostia Kultura)

Euskal musika entzuteko eta zabaltzeko plataforma berria sortu dute

Berriak garatutako Musika Berria egitasmoa abenduaren 5ean aurkeztuko dute Durangoko Azokan. Musikari eta taldeek beren edukiak kudeatu ahal izango dituzte, eta entzuleek euskal musika entzuteko eta ezagutzeko gune digital berri bat izango dute.

Euskal musika plataforma bakarrean biltzeko helburuarekin sortu du Berriak Musika Berria egitasmoa. Abenduaren 5ean jarriko dute martxan, Durangoko Azokan egingo duten aurkezpenaren ondoren. Musikarien eta entzuleen arteko harremanak sustatzea eta euskal musikaren zabalkundea indartzea ditu helburu.

Plataforma berriak 2009an sortutako Badok ataria izango du abiapuntu. Orain arte euskal musikari buruzko informazioa, abestiak, bideoak eta bestelako edukiak bildu dituen egitasmoari lekukoa hartuko dio, baina funtzionalitate berriak eskainiko ditu.

Berrikuntzetako bat musikaren kudeaketari dagokio. Musikariek eta taldeek beren profilak sortu eta edukiak zuzenean igo ahal izango dituzte, hala nola abestiak, diskoak, argazkiak, bideoak eta kontzertuei buruzko informazioa. Berriak, bestalde, argitaratutako edukien edizio-lana egingo du.

Streaming zerbitzu propioa

Musika Berriak musika zuzenean entzuteko streaming zerbitzua izango du. Webgunearen bidez ez ezik, iOS eta Android sistema eragileetarako aplikazioen bidez ere erabili ahal izango da.

Plataforma doakoa eta irekia izango da. Hala ere, zenbait funtzio erabiltzeko, hala nola gogoko abestiak gordetzeko edo erreprodukzio-zerrendak sortzeko, erregistratu egin beharko da.

Egitasmoak zerbitzari propioak izango ditu, Euskal Herrian kokatuak. Horrez gain, musikazaleek sortzaileei ekarpen ekonomikoak egiteko aukera izango dute, eta dohaintzen zenbateko osoa musikarientzat izango da.

Musika entzuteko aukerez gain, kazetaritza-edukiak ere eskainiko ditu plataformak, besteak beste, elkarrizketak, kritikak eta kronikak.

Durangoko Azokan aurkeztuko dute

Abenduaren 5eko aurkezpenarekin batera, hainbat jarduera antolatu dituzte Durangoko Azokan. Nize, Pisoo eta Ithaka taldeen kontzertuak, Xerra estudioarekin diskoen azalei buruzko tailerra eta musikaren inguruko mahai-ingurua izango dira, besteak beste.

Abenduaren 7an ere Musika Berria kontzertua egingo dute Plateruenan, Verde Prato, Silitia eta Malakiasen parte-hartzearekin.

Plataforma berriaren garapena Sarebide egitasmoaren barruan kokatzen da, Poctefa programaren finantzaketarekin. Bestalde, musikariek dagoeneko aukera dute Musika Berrian beren profila sortzeko.

Iturria: Itziar Ugarte Irizarrek Berrian 2026ko azaroaren 16an argitaratutako erreportajea eta Musika Berriaren webgune ofiziala.

Zabaldu:

Utzi erantzuna