‘Lera’ izeneko singlea kaleratu du Kokein taldeak

Kokein taldeak 20 urte bete ditu aurten, eszenatokietan, eta bizi-bizirik dagoela frogatu eta ospatzeko bi kantuz osatutako single berria eman du argitara, Lera izenpean.

Bi hamarkada hauek oharkabean pasatu direla aitortu du taldeak eta hainbeste denbora elkarrekin egoteko, proiektuarekiko duten grina eta pasioagatik izan dela azpimarratu dute. “Beste mila gauzari eskainiko ez geniokena taldeari eskaintzen diogulako, eta ez eskaini bakarrik, eman ere bai. Gure erreferentzia zena, ia guztiaren gainetik, gure lehentasuna bilakatu da. Inoiz bizi beharreko beste bizipen batzuk galdu baditugu, askotan, Kokeinengatik izan da. Eta horregatik, 20 urteak betetzen ditugun honetan, bi abesti berri prestatu ditugu. Irabazi dugun guztia ospatzeko.”