Merina Gris taldeak ‘Saiatzen naiz’ abestia eta bideoklipa aurkeztu ditu

Ed Is Dead produktore ospetsuak ekoitzi du lan berria eta Izaro abeslaria ere izan du alboan hirukoak.

Airaka diskoetxeak azaldu duenez, Donostiako Merina Gris taldeak Besteek zer aurkezpen kantuarekin zabaldu zuen “aurkezpen gutuna” iaz, eta “urakan bat bezala sartu zen eszenan, denen begiradak erakarri zituen hirukote misteriotsu honek”. Orain Saiatzen naiz lanarekin dator “olatu artistiko, musikal eta kultural berriaren lehen lerroan duten lekua berrestera”, adierazi dute.

Ed Is Dead produktore ospetsuak ekoitzi du lan berria eta Izaro abeslaria ere izan dute alboan. “Abesti honek taldearen alderdi berri bat erakusten digu. Besteek Zer kolpe indartsu, bizi eta atrebentziaz betea bazen, kanta berriak hirukoaren aurpegirik sentikorrena erakusten digu”, nabarmendu dute Airakako kideek.

Merina Gris (Sara, Julen eta Paskal musikariek osatutako taldea) “leku bat topatu ez eta erantzun gisa norberaren lekua sortzea da. Zuri edo beltz izan beharrean, tarteko zerbait izatea da. Hemen eta orain zarenaren erretratu bat da, uneko argazki bat”.

Taldea iaz jaio zen eta ‘pop zakarra’ izena eman zioten sortzen duten musika estiloari. Aurreneko diskoa pasa den urriaren 16an kaleratu zuten, taldearen esentzia ederki islatuz: “estereotipo izpirik ez; amu melodikoak; soinu organikoz lagundutako elektronika nagusi duten erritmoak, eta oroz gain, jarrera”.

Abestien gaiei dagokienez, taldeak norbera izateko gaurko gizartean bizi dugun barne borrokari buruzko gogoeta egiten du. Iruzur hutsa den norbaitez mintzo dira, “onartua ez izateko beldurragatik bere benetako izaera ezkutatzen duen norbaitez. Gizartean onartua izateagatik bera izateari uzten dion norbaitez”.