Arrisku Handiko Trena Eskapu bildumaren hirugarren liburua da. Idazleak urtero ale berri bat argitaratzen du. Duela bi urte 7G Udalekuak izenekoa kaleratu zuen eta iaz Azken denbora.
Nerea Loiola idazleak (Deba, 1985) Arrisku Handiko Trena (AHT) izeneko liburua aurkeztu du Donostian, Erein argitaletxearen eskutik. Eskapu bildumaren hirugarren alea da honakoa eta ‘aukeratu zure abentura’ eta ‘scapebook’ egitura uztartzen dituela azaldu du. Egileak duela bi urte kaleratu zuen bilduma honetako aurreneko liburua 7G Udalekuak izenburupean. Iaz, berriz, bigarrenak ikusi zuen argia: Azken denbora. Hala, urtero liburu berri bat argitaratzen du, “denek dituzte ezaugarri berberak”. Egileak azaldu duenez, “liburua irakurri ahala eta istorioan aurrera egin ahal izateko, momentu batzuetan irakurleak erabakiak hartu beharko ditu bi edo hiru aukera edo erantzun posibleren artean eta beste momentu batzuetan, aldiz, istorioak zein orritan jarraitzen duen jakiteko enigma batzuk ebatzi beharko ditu”. Horrela, liburuan aurrera eta atzera egiten, amaiera desberdinak biziko ditu irakurleak eta bizirik ateratzea edo ez lortuko du.
Misterioak, arriskuak eta abenturak dira liburu berri honen osagaiak. Loiolak irakurlea protagonista bihurtu nahi izan du oraingoan ere, “arriskuak, dilemak, eta abenturak aurkituko dituzu bigarren liburu honetan ere. Erabakiak hartu beharko dituzu eta enigmak ebatzi. Zure abileziak eta adimena erabili beharko dituzu. Erabaki txar batek hondamendia eragin lezake… eta heriotza ere bai! Baina ez etsi. Edozein unetan egin dezakezu atzera eta beste aukera bat hautatu, zure istorioaren ibilbidea aldatu dezakezu”, adierazi du.
Egileak azaldu duenez, lan berri honetan, “protagonistak Hendaiako tren geltokian dagoela jakingo du, ikasbidaian abiatzeko lagunekin, baina segurtasun kontrola igarotzeko nortasun agiria aurkeztu beharko du eta ezingo duenez aurkitu, muturren aurrean joango zaizkio lagun guztiak Pariserako trenerantz. Protagonista han gelditu beharko da, gehien gorroto duen irakaslearekin”. Azkenean, irakaslea konbentzitu eta gaueko trena hartuko dute. “Gaueko abiadura handiko tren horretan istorio misteriotsu bat abiatuko da”, aurreratu du Loiolak. “Desagerketa bat izango da, lagun berriak egingo ditu… eta, hala, pixkanaka erabakiak hartu beharko ditu susmagarriak edo errudunak topatzeko. Dena ondo bidean, Parisera onik iristea lortuko du”.
You may also like
