Aitor Renteria margolariaren ‘Ez bilatu argia’ erakusketa ikusgai Gasteizen

Bi eta hiru dimentsioen artean jokatzen duten obra sortu berriak dira, isiltasuna, hutsunea edo isolamendua bezalako kontzeptuen ingurukoak. Erakusketa otsailaren 4ra arte bisitatu ahal izango da.

Isiltasuna, hutsunea, isolamendua eta intenporalitatea ditu ardatz, eta piezen bi eta hiru dimentsioen artean jokatzen du Aitor Renteriaren (Donostia 1967) Ez bilatu argia izeneko erakusketak. Otsailaren 4ra arte bisitatu ahal izango Gasteizko Vital Fundazioa erakusketa-zentroan  eta sarrera doakoa izango da.

Renteriak azken urteotan landu dituen hainbat serieren bukaera diren lanak bildu ditu erakusketa honetarako. Bestalde, bi dimentsioko pintura hutsa baino joera tridimentsionalagoa edo eskultorikoagoa duten beste mota bateko lanen hasiera ere bada. Bere lana isiltasuna, hutsunea, isolamendua edo intenporalitatea bezalako kontzeptuetan oinarritzen da, eta pinturaren, kolorearen eta formaren alderdirik funtsezkoenetan zentratzen da, abstrakzioa eta figurazioa bereizi gabe. Gainera, hainbat teknika erabiltzen dira: akrilikoa, akuarela edo klarionak, zenbait euskarrien gainean, esaterako papera, zura, aluminioa edo metakrilatoa.

Ez bilatu argia izena jarri dio Renteriak erakusketari. Izan ere, erakusketa honen bidez, galdera bat egin nahi izan du: “Zergatik bilatu argia koadro batean? Zergatik irudikatu espazioa gainazal lau batean? Zein da bi dimentsioko lan baten eta hiru dimentsioko lan baten arteko muga? Edo, zergatik gailentzen da grisa?”.

“Honaino ekarri dituen prozesuak, asmatze baino akats gehiagorekin eta itxaropena baino ilusio handiagoarekin, obra autonomoak sortu nahi izan ditu egileak, autoerreferentzialak, behatzaileari ez beste inori jotzen diotenak, eta horri arreta pixka bat eskatzen diote osoak izateko”. Zentzu horretan, Renteriak uste du “arintasunaren, hutsunearen, isiltasunaren edo intenporalitatearen artean flotatzen saiatzen diren lanak direla, mugen inguruan jolasten dutenak, bi eta hiru dimentsioen artean, ikusten denaren eta ikusten ez denaren artean, alde honen eta bestearen artean”.

Ez bilatu argia otsailaren 4ra arte egongo da ikusgai Vital Fundazioa erakusketa-zentroan. Asteartetik larunbatera 18:00etatik 20:30era eta igande eta jaiegunetan 12:00etatik 14:00etara eta 18:00etatik 20:30era.

Zabaldu: