Erakusketaren irekiera ekitaldia apirilaren 9an egingo da Barandiaran Museoan, 12:00etan.
Herriko ondare eta arkeologia aberastasuna balioesteko asmoz, Arkeologia Ataunen: Aralarko historian murgiltzen izeneko erakusketa aurkeztu du Ataungo Udalak, Gipuzkoako Foru Aldundiko Kultura Departamentuarekin batera.
Barandiaran museoan egongo da ikusgai erakusketa berria, Ataungo San Gregorio auzoan, eta, bertan, herrian aurkitutako pieza esanguratsuenak jaso dira. Horrez gain, erakusketarekin batera, jarduera programa zabala antolatu dute.
Joxemiel Barandiaranek Jentilbaratzan lehen indusketa arkeologikoa egin zuenetik mende bat baino gehiago igaro ondoren, Ataun erreferente arkeologikoa da oraindik ere Gipuzkoan. Behe eta Erdi Paleolitikotik Erdi Arora arte, Agauntza ibaiak zeharkatzen duen haranean ehunka aurkikuntza egin dira, eta, horiei esker, Aralar inguruan bizi izan diren giza kulturak hobeto ezagutzeko aukera izan dugu.
Martin Aramendi Ataungo alkatea pozik agertu da, “denbora asko generaman erakusketa hau prestatzeko lanetan, eta horri esker itzuliko dira Atauna egun batean gure herriko aztarnategietan aurkitu zituzten pieza preziatuak”.
Amaitzeko, Mertxe Urteaga Gipuzkoako Foru Aldundiko arkeologoak, zeinak hitzaldi bat emango duen erromatarrei zori diegunari buruz, honako hau adierazi du: “pieza horietako bakoitzak Ataunen bizi izan diren kulturen bilakaerari buruzko historia esanguratsu bat kontatzen digu. Erakusketa hau gure ondarea babesteko eta ezagutarazteko zorroztasunez eta grinaz lan egin duten profesional eta erakunde askoren ahalegin bateratuaren emaitza da”.
Arkeologia Ataunen erakusketa
Ikusgai dauden ia 50 piezen artean, aipatzekoak dira Usategiko azagaia, izturitze motakoa; Pikanditako arrankazi edo arpoia; Allekoaitzeko lehoinabar buru-hezurra, Usategiko denarioak eta Jentilbaratzako eraztun ospetsua. Gainera, interpretazio panelak prestatu dira aurkikuntza bakoitza testuinguruan kokatzeko eta ulerterrazago egiteko.
Erakusketari hasiera emateko ekitaldia datorren apirilaren 9an egingo da Barandiaran Museoan, eta bertan izango dira Ataungo Udaleko eta Gipuzkoako Foru Aldundiko ordezkariak, bai eta Aranzadiko, Euskal Herriko Unibertsitateko, Gordailuko, Parketxe Sareko, Barandiaran Fundazioko eta Ataunikerreko kideak ere, antolakuntzan lanetan ibili baitira.