Sayoa Belarrak eta Xian Martinezek, gaur irekiko dituzte edizio honetako egoitzak, Pioneras proiektuarekin, Tafalla Kulturgunean.
Dantza garaikideko bederatzi konpainia, lau egoitza, bederatzi erakustaldi, bost bitartekaritza-jarduketa eta beste jarduera osagarri batzuk dira hamar udalerritan egingo den Nafarroako Dantza Garaikidea programa osatzen dutenak. Ekimena Kultura Zuzendaritza Nagusiak eta Baluarte Fundazioak antolatu dute Antsoain, Agoitz, Bera, Etxarri Aranatz, Lizarra, Los Arcos, Arangurengo harana, Ribaforada, Tafalla eta Atarrabiako udalekin lankidetzan. Guztiak Nafarroako Antzoki Sareko kideak dira eta Nafarroako Museoak eta Uharteko Arte Garaikideko Zentroak ere hartuko dute parte programan.
DNA dantza garaikidea eta mugimenduaren arteak sustatzea helburu duen programa artistikoa da. Sorkuntza eta ikerketa egoitzen aldeko apustua egiten du, sektorearen kohesioa lantzen jarraitzeko eta jendearengana hurbiltzeko tresna gisa.
Hala, DNA 2020k, alde batetik, Nafarroako Antzoki Saretik hautatutako espazioetan sorkuntza- eta ikerketa-egoitzak egiteko aukera eskainiko die dantza-profesionalei, eta horiei herri bakoitzeko ikus-entzuleekin egingo diren bitartekaritza-jarduerak eta hausnarketarako topaketak gehituko zaizkie. Bestetik, egoitzen fruitu diren obrak erakutsiko dira, beste espazio eta eduki batzuen esparruan sorturiko sorkuntza-esperientziez gain, Erriberriko Jaialdian edo mugaz gaindiko Atalak proiektuan, adibidez. Horrela, Kultura Zuzendaritza Nagusiak – Vianako Printzea Erakundeak antolatutako programen artean sorturiko sinergiak profitatuko dira.
Gainera, egitaraua dantzaren eta lurraldearen arteko lotura sendotzera bideraturiko jarduerekin osatuko dela iragarri dute, Nafarroako dantza garaikidea eta mugimenduaren arteak baloratzeko helburu komunean lan egiten duten erakundeekin eta pertsonekin elkarlanean.
Sayoa Belarrak eta Xian Martinezek, gaur, uztailaren 1a, irekiko dituzte edizio honetako egoitzak, Pioneras proiektuarekin, Tafalla Kulturgunean. Belarrak eta Martinezek, biak dantzari profesionalak, elkarrekin zuzentzen dute bost interpreterentzako hiru eszena dituen artelana. Bertan, omenaldi gisa, historian zehar, oraindik existitzen ez den berdintasun soziala lortzeko borrokatu diren emakume aitzindarien, ezagunen edo ezezagunen, ekintzak bilduko dira.
Egoitzan, sorkuntza-prozesuaz gain, emakumeei zuzenduriko belaunaldien arteko tailer bat eta egindako lanaren lagin bat egitea ere aurreikusten da. Horren xehetasunak aurrerago argitaratuko dira.
Aurten, Tafallaz gain, Antsoainek, Agoitzek eta Ribaforadak ere zenbait proiekturen sorkuntza prozesuak jasoko dituzte uztailetik irailera: Andrearen Re-Des Irurtzunen (abuztuaren 3tik 30era Ansoain Antzokian); Estitxu Arroyoren La memoria de la carne (irailaren 1etik 28ra Ribaforadako Kultur Etxean); eta Ines Auberten En Tiempo (uztailaren 20tik 31ra eta abuztuaren 31tik irailaren 11ra Agoitzeko Kultur Etxean).
Prozesu horietan, konpainiek Natividad Builen laguntza izango dute sorkuntzarako. Proiektuen garapena ezagutzeko eta proiektu bakoitza besteekin elkarrizketan jartzeko gakoak aurkitzeko egingo du lan, irailaren 25ean Uharteko Arte Garaikideko Zentroan egingo den amaierako jardunaldiari begira.