Erakusketarekin batera, objektu arkeologikoak ustekabean aurkituz gero zer egin behar den azaltzeko liburuxka ere aurkeztu dute.
Gasteizeko Bibat-Arkeologia Museoan paratu dute Galdutako altxorraren bila. Kalte konponezina gure ondarearentzat izeneko erakusketa. Gaur aurkeztu du Arabako Aldundiak Objektu arkeologikoak ustekabean aurkitzea. Zer egin behar dut? izeneko eskuliburuarekin batera. Biak ala biak Kultura eta Kirol Sailaren mendeko Museo eta Arkeologia Zerbitzuak garatu ditu.
Erakusketa eta liburuxkaren bidez, “gure herrialdean metal detektagailuen erabiltzaileen kontrolik gabeko jarduerek ondare arkeologikoari eragiten dizkioten kalte larriak ezagutarazi nahi dira”, adierazi du Ana del Val Kultura eta Kirol foru diputatuak. Horretaz gain, “herritarrak kontzientziatzeko eta inplikatzeko mekanismoak indartzen lagundu nahi dute, kultura ondarearen defentsan eta babesean”.
Del Valen arabera, “azken aldian, urtean salaketa bat jartzetik ia dozena bat salatzera igaro gara 2020an, gehienak aztarnategi arkeologikoetan baimendu gabeko pertsonek metal detektagailuak erabili dituztelako”. Ekintza horiek ondarea suntsitzen laguntzen dutela dio, eta horregatik “jardun behar dugu eta jarduten ari gara, ez bakarrik legea aplikatuz, baita herritarren pedagogia eginez ere”.
Erakusketan nabarmendu nahi dute diziplina arkeologikoa ez dela soilik pieza politak berreskuratzera bideratutako zientzia, baizik eta iraganeko gizarteak nolakoak izan ziren ezagutzen laguntzen duten hainbat prozedura dituela, orainera iritsi diren eta batez ere lurpean kontserbatzen diren aztarnei esker.
“Iragan hori deskodetzeko, objektuak bezain garrantzitsuak dira lurperatuta dauden estratuak, eta bi elementu horien arteko loturak ematen du informazioaren emaria”, adierazi du diputatuak.
Bestalde, liburuxkan azaltzen da zer egin beharko litzatekeen norbaitek ondasun arkeologikoren bat Araban aurkituko balu, baita lurra mugitzeagatik agertu bada ere, eta gomendatzen da metalen detektagailurik ez erostea baldin eta asmoa jarduera horretara bideratzea bada, indarrean dagoen legedia gogoraraziz.