Interpretazio-zentroa EMYA 2025 sarietarako izendatu dute Europako museo onenen artean. Baina, aurretik, 2025eko Museo Saria esleitu dio Europako Kontseiluko Parlamentu Biltzarreko Kultura Batzordeak, “euskal kulturari eta gizarteari egindako ekarpenagatik”.
Apirilaren 7an, astelehena, Europako Kontseiluko Parlamentu Biltzarreko (PACE) Kultura Batzordeak Museo Saria emango dio Bilboko San Inazio auzoko Euskararen Etxeari, modu ofizialean. Iurdana Acasuso Euskararen Etxeko zuzendariak hartuko du sari hori, Europako Kontseiluaren Estrasburgoko egoitzan egingo den ekitaldi batean.
Euskararen Etxea “museo txiki bat” dela nabarmendu du antolakuntzak, hizkuntza bat babesteko erronka erakusten duena. “Hona datozenek euskaraz entzun, irakurri eta abestu dezakete. Erakusketa lau hizkuntzatan dago (euskara, gaztelania, ingelesa eta frantsesa), eta horri esker bisitariek aukera izango dute Europako hizkuntza horiek elkarrekin dituzten antzekotasunak eta eraginak arakatzeko”.
Konstantinos Efstathiou (Zipre, SOC) Museo Sariaren Batzordeko ordezkariaren arabera, “Euskararen Etxea oinarriko ekimen bat da, belaunaldien arteko jarduerak dituena euskararen transmisioa eta erabilera sustatzeko. Museo txiki handia da, eta pertsonal iraunkorreko hiru langile baino ez ditu, zeinek jarduera asko eta bazkide-sare bat kudeatzen dituzten”.
1977. urteaz geroztik, Europako Kontseiluaren Museo Saria museo bati ematen zaio urtero, era aipagarrian laguntzeagatik Europako kultur ondarea ulertzen, giza eskubideen eta demokraziaren errespetua sustatzen, kultur zubiak sortzen, muga sozial eta politikoak gainditzen, egungo problema sozialei buruz bisitariek duten ezagutza eta ulermena areagotzen eta herritartasun demokratikoaren ideiak esploratzen.
Euskararen Etxeak irabazitakoa Europako urteko museoaren sarien (EMYA) parte da. Białystok-eko Sybir Oroipen Museoa (Polonia, 2024), Kopenhageko Langileen Museoa (Danimarka, 2023) eta Cork-eko Nano Nagle Place (Irlanda, 2022) dira aurreko urteetan saria jaso dutenetako batzuk.