Itzaletik ikusgarritasunera ekarri nahi dituzte plazak, urtean zehar euskal irakurle eta musika zaleari ibilbide bat proposatuz Euskal Herrian barna, euskara hutsez egiten diren ekimenak isolatuak ez direla erakutsi eta elkarri josiz haiek indartzeko.
Urtero hainbat ekimen egiten dira Euskal Herriko herrietan, euskara hutsezko liburu eta diskoak plazara ateratzeko eta jendartean ezagutzera emateko: azokak, egitarau bereziak, jardunaldiak… Horien arteko sarea josteari ekin diote orain, indarrak batzeko eta aurtengo egutegia eta bakoitzaren ekimenak elkarrekin aurkezteko. “Azkoitia (Geure Gelatik), Baztan ((H)ilbeltza), Galdakao (Sormene), Hernani (Liburu eta Disko azoka), Lazkao (Liburu eta Disko azoka), Sara (Ikusi Mikusi), Zarautz (Literaturia) eta Ziburu (Liburu eta Disko Azoka). Zortzi herri eta hautu bat: euskara hutsezko azokak eta plazak antolatzea euskal literatura eta musikagintza sustatzeko”, adierazi dute.
Doinuele jarri diote izena sareari, eta hastapen honetan zortzi herri edo zortzi ekimen elkartu badira ere, sare honetan parte hartu nahi duten gainerako ekimenei ateak ireki dizkiete. “Zortzi herri eta errealitate ezberdinak: batean euskara ofiziala baina derrigorrezkoa ez, bestean koofiziala edo soilik toleratua. Baina arazo bera: legezko babes ofiziala ukan edo ez, euskara hutsez bizitzeko nekezia edo ezintasuna eta euskaraz (ere) bizitzeko lanak! Hots, kasurik hoberenean gure hizkuntz eskubideak aitortuak badira ere ez dira bermatuak, ez aplikatuak”, diote egitasmoaren sustatzaileek. “Ezagutzak gora egin badu ere azken hamarkadetan, erabilerak kale. Gutxiengoan gaude euskaldunak euskararen herrian, gutxiago egunero erabiltzen (ahal) dugunak, eta oraindik gutxiago euskaraz irakurtzen dugunak”.
Diotenez, hizkuntza guztien arazoa da liburua eta diskoa ez daudela, baina egoera are larriagoa da minorizatuan dauden mintzairen kasuan. “Ez da txikia eta arriskurik gabea euskara hutsez aritzeko hautua egitea: sortzaileek, idazle nahiz musikariek, murritzagoa publikoa; editore eta diskoetxeek apalagoa bezero kopurua; plaza eta azokek bisitariena”.
Eta, hala ere, hor daudelala azpimarratu nahi izan dute, “lehen eta orain aukera bera egin duten beste asko bezala, euskara hutsak betetzen gaituelako. Aspertuta gaude gure hautua azaldu, justifikatu eta defendatu beharraz: euskaraz bizi nahi dugu normaltasunez, naturaltasunez eta lasaitasunez. Herri batzuetan, zorionez, hori gehiagotan lortzen badute ere, denei parada ematen diegu gure plazek irauten duten egunetan euskararen herrian murgiltzeko eta hartaz gozatzeko. Ez baita gutxi”.
Hala, euskara hutsezko publikoa, irakurlegoa, entzulegoa, haur, gazte eta heldu, indartzea dute helburu; “euskaraz bizi den sarea zabaltzea; azokak errentagarri egitea, jendetsuak eta biziak, anitzak, euskararen komunitatearen topaleku eta ispilu; kultur sortzaileak, idazle eta musikariak, ilustratzaileak eta itzultzaileak, editoreak eta literatura aldizkariak sostengatzea; euskalduna den jendea liburu-diskora ekartzea eta liburu-diskoa herritarrei hurbiltzea; euskarazko liburu eta diskogintzaren aniztasun eta aberastasuna plazan ikusaraztea. Goxo eta atsegingarri baita euskaraz bizitzea: gure txikian bagara nor, hemen gaude eta egon gura dugu”.