(argazkia: Jakin)

‘Egunero behar genuen’ liburua kaleratu du Imanol Muruak

Lana Berriak, Elkarrek eta Jakinek argitaratu dute, eta Egunero-ren kontaketa biltzen du, Muruaren bizipenetatik abiatuta, izan ere, egileak bertatik bertara ezagutu zituen Egunero egunkaria eta Egunero-ren inguruabar guztiak. Euskal prentsaren historian lekutxo bat duen egunkari hura jaio eta hil zela hogei urte betetzen diren honetan ikusi du argia lan berriak.

Imanol Muruak ondutako Egunero behar genuen liburua Egunero egunkariaren kronika da, emergentziazko egunkari baten bizialdi laburraren kronika, alegia. Izan ere, Egunero 2003ko otsailaren 21ean sortu zen Euskaldunon Egunkaria indarrez itxi eta hurrengo egunean bertan eta urte hartako ekainaren 20an argitaratu zen azkenengo aldiz, Berria plazaratu bezperan. Beraz, zubi bat izan zen, euskarazko egunkari bat kioskoetan etenik gabe egotea ahalbidetu zuena.

Egoera ez zen arrunta eta egunkari hura ere ezin arrunt edo normalizatua izan, ezer baino lehen, Egunkaria-ren itxiera bidegabeari emandako erantzuna izan baitzen. Ezaugarrietan ere, prekarioa izan zen, halabeharrez.

Paradoxikoki, euskarazko egunkari batek inoiz izan dituen irakurle, erosle eta harpidedun gehien izan zituen. Hura Egunkaria-ren itxierak eragindako elkartasun-olatuari esker izan zen, jakina, Egunero egun batetik bestera plazaratzea eta lau hilabetez irautea ez baitzen inolaz ere langile talde baten borondatearen eta lanaren ondorio hutsa izan.

Imanol Muruak bertatik bertara ezagutu zituen Egunero eta Egunero-ren inguruabar guztiak, eta haien berri ematen digu liburu honetan, bizi-bizi eman ere, euskal prentsaren historian lekutxo bat duen egunkari hura jaio eta hil zela hogei urte betetzen diren honetan.

Zabaldu: