Urriaren 4ra arte egongo da izena emateko epea zabalik.
Iazko edizioaren arrakastaren ondoren, Mazoka Marrazki Azokaren VII. edizioa komunitate bat eta lanak online saltzeko merkatu bat izango da aurten ere. Edizio berri honek sortzaileengan jarriko du arreta: “haien ibilbidea sustatuko du, eta teknikak, estiloak eta proiektu-aniztasuna erakutsiko ditu. Abenduan eta, batez ere, Gabonetan, aparteko erakusleihoaz gozatzeko aukera izango da. Erakusleiho horretan, klik bakarrera egongo dira originaltasuna eta egiletza, eta etxean bertan jaso ahal izango dira eskaerak”, azaldu dute antolatzaileek.
Azokaren marketplace-an ez ezik, partehartzaileek Gasteizko Montehermoso Kulturunean egingo den erakusketa batean ere jarriko dituzte ikusgai beren lanak, eta VII. edizioaren harira argitaratuko den egileen bigarren katalogoan sartuko dira.
Mazokalari gisa izena emateko, urriaren 4ra arte egongo da epea zabalik, “bai 40 postuetako bat lortu ahal izateko, bai marrazkigintza, animazio, diseinu edo arteko ikasleei zuzendutako Bekikasle beka eskuratu ahal izateko”. Interesa dutenek webgunean dagoen inprimakia bete beharko dute. Urriaren 21ean ezagutaraziko da epaimahaiaren erabakia.
Marrazkiaren eta arte plastikoen balio berriak ezagutzen laguntzeaz gain, Mazokaren formatu berri honek “aukera paregabea eskaintzen du nazioartera zabaltzeko”, nabarmendu dute antolatzaileek.
Erakusketa
Abenduan edizio honetako 40 mazokalarien ilustrazioak ikusgai egongo dira Montehermoso Kulturunean. “Erakusketa horrek beste formatu bat izango du, baina oraindik ezin dugu esan zein”, dio antolakuntzak.
Bertan, katalogoaren ale bat lortu eta hainbat esku-hartze artistikotan parte hartu ahal izateaz gain, bisitaria lan bakoitzaren historian murgildu ahal izango da, argitu beharreko eta jolasteko labirinto bat izango balitz bezala. Teknika, euskarri eta estilo desberdinak erabiliz egindako 40 lan ikusi ahal izango dira, eta bakoitzak QR kode bat izango du, hautatutako mazokalari bakoitzaren “postuaz” mugikorraren edo tabletaren bidez in situ gozatu ahal izateko.
Pieza bakoitzean, egile bakoitzaren kreditua ez ezik, ilustrazioaren deskribapen labur bat ere egongo da, euskaraz, gaztelaniaz eta ingelesez, baita webgunearen helbidea ere, egilearen beste lan batzuk eta haren estiloa eta teknika ezagutzeko eta salgai dauzkan lanak eta aplikazioak ikusteko.