Txotxongilo garaikideak, antzerki bisuala, zinema, zuzeneko musika eta gorputza, objektua eta paisaia uztartzen dituzten proposamenak izango dira uztailaren 7ra arte.
Teatro Panta Rhei Antzerki taldeak urtero antolatzen duen Festikale, Landa Inguruneko Arteen Jaia, gaur abiatuko da Zigoitian eta hilaren 7ra arte luzatuko da. Antolatzaileen esanetan, “Gorbeialdea, Arabako Lautada, Arabako Mendialdea eta Arabako Errioxako paisaiak sorkuntza garaikiderako, topaketarako eta emozio partekaturako agertoki bihurtzen dituen diziplina anitzeko jaialdia da Festikale”.
Hamabigarren edizioa izango du aurtengoak eta berrikuntzan, berdintasunean, iraunkortasunean eta kulturarako sarbidean jarri du arreta, “artisten eta publikoen arteko lotura zuzenaren aldeko apustua eginez”. Gainera, aurten, jaialdiak lurralde-sarea zabalduko du, eta egoitza berriak jarriko ditu Zuian, Legution eta Burgelun, sormen-mapa horri gune berriak gehituz.
Hala, txotxongilo garaikideak, antzerki bisuala, zinema, zuzeneko musika eta gorputza, objektua eta paisaia uztartzen dituzten proposamenak irakurketa, poesia eta jolasa sustatzeko instalazioekin osatuko dira, adin eta publiko guztientzat. “Esperientzia ikusgarriak, eskuragarriak eta eraldatzaileak sortzeko pentsatutako programazioa” izango dela nabarmendu du antzerki taldeak. “Jaialdiak programazio inklusibo eta askotarikoaren aldeko apustua egiten jarraitzen du, inguruko errealitateekin hitz egiten duten estilo eta jatorri desberdinetako proposamen eszenikoekin. Artisten eta ikusleen arteko trukea erraztuko duten bitartekaritza-espazioak emango dira”, adierazi dute.
Antolatzaileen esanetan, “Festikale 2025 ez da soilik jaialdi bat izango, sormenaren ospakizun kolektiboa baizik, komunitatean izandako esperientzia artistikoa eta kultura lurraldearen bihotzetik bizitzeko gonbidapena”.
