Ondarearen Europako Jardunaldien V. edizioak egitarau zabalagoa du; edukiera mugatua izango da eta aldez aurretik eman beharko da izena.
Kontaiguzu Ondarea! Ondarea eta Hezkuntza da gaur goizean Mari Jose Telleria Kultura Foru Zuzendariak aurkeztutako Ondarearen Europako Jardunaldien V. edizioaren programaren izena; bertan izan da programa osatzen duten 70 antolatzaileen ordezkaritza txiki bat ere: Leire Arandia, D’Elikatuz zentroko zuzendaria; Rosa Errazkin, Laboratorium Museoko arduraduna; eta Luis Mokoroa, Euskal Gastronomia Elkarteko bazkidea.
Aurkezpenean azaldu dutenez, ehun bat jarduera eta 150 ekitaldi izango dira Gipuzkoan zehar, 70 erakundek antolatuta. Programa Gipuzkoa Kulturaren webgunean dago eskuragarri eta irailean hasi eta azaroan amaituko da.
Europako Kontseiluaren ekimen honen xedea da ondarearen garrantzia balioetsi eta herritarrei gerturatzea. Hala, ondarea kontserbatzeari eta gozatzeari begira betetzen duen zereginean jarri nahi dute arreta. Halaber, hezkuntza erakundeei eta utzitako ondare materialari zein immaterialari balioa ematea da helburua.
“Aurten, gure ondarea agerian uzteko konpromisoa, ilusioa eta gogoa are handiagoak izan dira aurreko urteetan baino, eta hori erronka handia izan da parte hartu duten eragile guztientzat, Covid-19k eragindako murrizketa eta ziurgabetasunengatik”, azaldu du Telleriak.
Izan ere, Kontaiguzu Ondarea. Ondarea eta Hezkuntza osatzen duten jarduerek hezkuntza erakundeen ondarea aztertzen duten proposamenak bildu dituzte; Ordizian esaterako, Ordiziako irakaskuntzari begirada bat erakusketa zabalduko da urriaren 1ean D’Elikatuz zentroan. “Erakusketa honen bidez, Ordizian XIX. mendearen amaieratik gaur egunera arte egon diren ikastetxeak ekarri nahi dira gogora. Ikasle, irakasle, eskolak ematen ziren eraikin edo leku, edo ikastetxe guztietako ikasleak biltzen zituzten ikasturte amaierako festen argazkiak ikusi ahal izango dira. Horrekin guztiarekin, hezkuntza prozesu ororen atzean dagoen ondare materiala zein immateriala balioan jarri nahi dugu”, adierazi du D’Elikatuz zentroko zuzendariak.
Jardunaldi hauen xedea da ondareari balioa ematea, Gipuzkoako herritarrei ohi ez bezalako beste modu batean gerturatuz, gai komun batekin, eta egun jakin batzuetan. Rosa Errazkin Bergarako Laboratorium Museoko arduradunak azaldu duenez, “Laboratorium Museoak urteak daramatza Ondarearen Europako Jardunaldietan parte hartzen, Bergarako ondarea ikusarazteko balio digu, eta aukera bikaina da antolatzen ditugun jarduerei zabalkunde handiagoa emateko. Ezinbestekoa da ondarea babestea, zaintzea eta baldintza onenetan ikusgai jartzen asmatzea”.
Aparteko egoera bizi dugun arren, aurten 2019an baino eskaintza handiagoa izango dute herritarrek; izan ere, erakunde gehiago animatu dira antolatzaile gisa parte hartzera (% 30). Hori da, hain zuzen ere, Gastronomiaren Euskal Kofradiaren kasua, aurten lehen aldiz parte hartuko baitu jardunaldietan, eta lau jarduera antolatuko ditu. “Kofradiak, 1961ean sortu zenetik, euskal sukaldaritza ezagutzera eman nahi izan du munduan, besteak beste, ekitaldien bidez. Gaur egun ez daukagu hasieran besteko oihartzunik, eta, horregatik, gure lana zabaltzen jarraitu nahi dugu. Horretarako, gizarteari gure ekarpena egin nahi izan dugu, gure kofradiari dagozkion lau jarduera antolatuta” adierazi du Mokoroak.
Aurkeztutako jarduera programa oso zabala da, eta hainbat gai jorratzen ditu: zinema, botanika, musika, dantza, mitologia, gastronomia, hiri kultura, artea, arkitektura. Gainera, ikusleek gazteentzako, familientzako eta helduentzako jarduerez gozatu ahal izango dute: ikuskizunak, fanzine tailerrak, bisita eta ibilbide antzeztuak edo gidatuak, tailer edo jardunaldi gastrokulturalak, erakusketa fisiko eta birtualak…
Jardunaldi hauek herritarrengana hurbiltzeko asmoz, jardunaldiei buruzko liburuxkak argitaratu dituzte, museo, turismo bulego eta kultur etxeetan banatzeko.
Programa osoa eskuragarri, hemen.