Manuel Abramovich, Claire Atherton, Laura Citarella, Tizza Covi eta Rainer Frimmel, Valerie Delpierre, Violeta Gil, Víctor Iriarte, Radu Jude eta Claudia Llosa izango dira aurtengo tutoreak.
Fede Gianni, Alexandra Latishev, Kathy Mitrani, Joana Moya, Jaime Puertas Castillo eta Daniel Soares dira Ikusmira Berriak programaren hamaikagarren edizioko egoiliarrak. Martxoaren 24tik ari dira lanean Tabakalerako Zine eta Ikus-entzunezko Laborategian. Han bertan izaten ari da Ikusmira Berriak ikus-entzunezko proiektuen garapenerako egonaldien programaren hamaikagarren edizioaren lehen fasea, Donostiako Zinemaldiak, Tabakalerak berak eta Elias Querejeta Zine Eskolak (EQZE) antolatuta.
Laborategian bertan egin dute gaur prentsaurrekoa eta edizio honetarako hautatutako sei zinemagileak aurkezteaz gain, online tutoretza pertsonalizatua nork emango dien ere jakinarazi da, betiere bakoitzaren beharrak eta eskaerak kontuan hartuta.
Hala, Fede Gianni italiarraren tutorea Manuel Abramovich zinemagile argentinarra izango da. Gianniren proiektua Il Cascatore da, eta iaz Veneziako Kritikaren Astean hautatua izan zen izen bereko film laburra du oinarri; bestalde, Abramovichek argazki onenaren Epaimahaiaren Saria irabazi zuen Donostian, Ikusmira Berriak programaren barruan landutako Pornomelancolía (2022) filmarekin, Zabaltegi-Tabakalera sailean Soldado (2017) eta Blue Boy (2019) lanak aurkeztu ostean. Laura Citarella zuzendari eta ekoizle argentinarra izango du tutore Alexandra Latishev costarricarrak. Citarellak Trenque Lauquen (2022) aurkeztu zuen Zabaltegi-Tabakaleran, Veneziako Orizzonti sailean estreinatu ondoren, eta oraingoan Mermaids hirugarren film luzearekin lagunduko dio Latishevi; EQZEko ikasle izandakoaren lehen proiektua Medea (2017) izan zen, eta Horizontes Latinos sailean proiektatu zen. Tizza Covi eta Rainer Frimmel zinemagileak Vento Film austriar ekoiztetxearen sortzaile dira, eta Ikusmira Berriak programaren aurreko edizioetan tailerrak eman izan dituzte; aurten, ordea, Jaime Puertas Castillo EQZEko ikasle ohiaren tutore izango dira, eta Return to the Valley bigarren film luzearekin lagunduko diote, Rotterdamen Historia de pastores lana estreinatu ostean.
Valerie Delpierre ekoizleak hainbat proiektutan parte hartu du, hala nola Estiu 1993 (2017), 20.000 erle espezie edo Los destellos, eta Joana Moya hartuko du tutoretzapean; Moya Noka programako egoiliar izan da, Kimuak programaren katalogoan sartutako Todo lo cubre la sal film laburra egin zuen eta, orain, La Koreana proiektuarekin ari da buru-belarri. Radu Jude zinemagile errumaniarrak film onenaren Urrezko Hartza irabazi zuen Berlinale zinema-jaialdian Babardeală cu bucluc sau porno balamuc (Zabaltegi-Tabakalera, 2021) filmarekin, eta Daniel Soares portugaldarraren tutore izango da aurten; Soaresek aipamen berezia lortu zuen Canneseko film laburren lehiaketan Bad for a Moment proiektuarekin eta 900 toneladas / 900 Tons lehen film luzea landuko du egonaldian.
Azkenik, Kathy Mitrani sortzailearen tutore Claudia Llosa izango da; Llosak ere irabazi zuen Urrezko Hartza Berlinalen The Milk of Sorrow (2009) filmarekin, eta Donostiako Sail Ofizialeko lehian aurkeztu zuen Fever Dream (2021) filma. Mitraniri dagokionez, Nest sailean Nothing But Shadows (2023) film laburrarekin parte hartu ondoren, orain bere lehen film luzea prestatzen ari da: The Dance of the Shadows.
Lehen egun hauetan, zer baliabide izango dituzten ezagutzeko aukera izan dute egoiliarrek. Era berean, sarbidea doan izango dute Tabakalerako pantaila partekatuko proiekzio guztietan, Euskadiko Filmategiko zinema-aretoan eta Medialab guneko funtsetan.