Azken arnasa da liburuaren izenburua eta 35 partitura biltzen ditu, bai banakako ikasketetarako bai talde-lanerako pentsatuak. Errepertorioa egungo ikuspegitik zabaltzeko interesa duten musika eskola, kontserbatorio eta musikariei zuzenduta dago.
Iñaki Palacios musikari eta konpositoreak bere ibilbide artistikoaren funtsezko zati bat biltzen duen partitura liburua argitaratu du, euskal folklorean dituen sustraietatik hasi eta tradizioa eta soinu hizkuntza berriak uztartzen dituzten proposamen garaikideagoetaraino.
Argitalpenak 35 partitura biltzen ditu, bai banakako ikasketetarako bai talde-lanerako pentsatuak, eta errepertorioa egungo ikuspegitik zabaltzeko interesa duten musika eskola, kontserbatorio eta musikariei zuzenduta dago. Lan horiek bere proiektu diskografiko eta eszenikoen parte dira, eta musika ikasteko, jolasteko eta etengabe eboluzionatzeko espazio gisa ulertzeko modu bat islatzen dute.
Baga Biga diskoetxeak azaldu duenez, “formatu fisikoaren osagarri gisa, liburuak USB bat du txartel formatuan, abesti guztiak backing track bertsioan dituena, eta horrek aukera ematen du audioen gainean jotzen entseatzeko eta taldearen barruan sentitzeko”.
Palaciosen egitasmo hau bokazio pedagogiko eta kultural argi batekin sortu da: “ikasgelarako material erabilgarria eskaintzea, txistua testuinguru berrietara hurbiltzea eta tradizioak bizirik jarraitzen duela eta eboluzionatzen ari dela erakusteko”.
Liburua egilearen webgunean (www.inakipalacios.eus) eta Baga-Biga diskoetxearen webgunean (www.baga-biga.eus) eskuratu ahal izango da.