Martxoaren 3an, astelehena, Haurren egunari dagokion txikienentzako programa antolatu dute.
Eskaileraren kosketako bakoitzean ekitaldi batzuk antolatuz, Iruñeko Udalak sanferminetako programa nagusiari keinu egin nahi izan dio. Jarduera hauekin festekiko grina piztea da asmoa. Horretarako, koska bakoitzak jaiegunetako bat izango du ardatz: “sanferminetako egun bakoitzari dagokion programa tematikoa antolatu dugu”. Hori horrela, martxoaren 3an, astelehena, Eskailerarekin lotutako ekitaldietan Haurren eguna ospatuko dute, eta besteak beste, jolasak, disko-festa eta zezen gurpilduna izango dira. Gainera, Elkarbizitzaren eguna eta Senidetzeen eguna ospatuko dituzte, besteak beste.
Ekimenaren bidez, Udalak sanferminen urtarokotasuna hautsi nahi du, eta festak hiriaren erdigunean ospatzeaz gain, beste toki batzuetara ere eraman nahi ditu. Horretarako, kultur proposamen bat eskaintzen du, festak hasi baino lehen, festen bitartean eta ondoren. Horrekin guztiarekin batera, “festen sinbologiari eta tradizioari eutsi nahi diogu, hiriko kulturan eta hirian bertan ezinbestekoak baitira”.
Azaldu dutenez, “programak festa bera eta hiriarekin lotutako kontakizuna islatzen ditu, jende orori zuzenduta dago, eta garrantzia eman nahi die jaien izaera herrikoiari eta programaren aberastasunari. Eskaileraren sei koskak Iruñeko auzoetan eta guneetan barna doaz, eta festa hiriko txoko guztietara eraman nahi dugu”. Gainera, sanferminetako jaiegunen gaiarekin jolasean arituko da.
Aurtengo bi lehenengo Eskailerak ospatu dituzte dagoeneko: Urtarrilaren 1eko Eskaileran pregoi bat egin zuten, festetako ekitaldi ospetsuenetako bat hizpide hartuta: su artifizialak. Egun horretan hasi zen festetarako atzerako kontaketa, eta erloju digital baten bidez abiarazi zuten. “Atzerako kontaketa hori koska guztietan egonen da ikusgai”. Otsailaren 2an Adinekoentzako egunari lotutako programa bat jarri zuten martxan eta Iturrama musikaz bete zuten. Programa osatzeko, mexikarrak eta jotak ere izan ziren.
Haurren eguna
Astelehenean, hirugarren koskaren txanda izango da hiriko haurrentzako programa batekin. Izan ere, ikastetxeetan jaieguna da, Inauterien harira. 11.00etan, jarduera hauek egingo dituzte Askatasun plazan: egurrezko jolasak eta puzgarriak. 17:30etik 18:00etara, eskorga-zezenen txanda izango da, txikienen artean zezen-lasterketen grina pizteko. Festaren amaieran, familia guztiarentzako disko-festa bat egingo dute plaza horretan bertan, 18:00etatik 19:00etara.
Apirilaren 4an, berriz, aniztasuna eta kulturartekotasuna jorratuko dituzte. Izan ere, Elkarbizitzaren eguna ospatuko da egun horretan, eta kultur proposamen bat antolatu dute Arrotxapeako Anelier pasealekuan. Programa 18:00etan hasiko da eta hainbat musika-taldek beren kantak joko dituzte, aniztasuna oinarri hartuta.
Maiatzaren 5ean, bosgarren koska izango da, Ziudadelan: Iruñeko eta Nafarroako ohiturak sustatuko dituzte, eta hiriarekin senidetutako hiriak ekarriko dituzte gogora; Baiona, Yamaguchi (Japonia), Paderborn (Alemania) eta Pamplona (Kolonbia) dira hiri horiek. Bertsolariak, dantzariak, txistulariak eta gaiteroak arituko dira, herri-kirolak izango dira, eta antzerki erako bisita bat egingo dute Ziudadelara.
Azken koska ekainaren 6an izango da eta Yamaguchi aukeratu dute jardueren ardatza izateko. Eskailerarekin lotutako festen azken ekitaldia izango da, sanferminak gertuago dauden seinale. Izan ere, sanferminetako egun bat antolatu dute, baina ekitaldi gutxiagorekin: haurrentzako gune bat eta Kirolari izeneko nerabe eta gazteentzako kirol-jokoen gune bat antolatuko dituzte, eta musikak ere garrantzia izango du.