(argazkia: Donostia Kultura)

Izaskun Igoaren ‘Hotza bazkatzen’ poema bildumak irabazi du Donostia Kultura V. Poesia Saria

Epaimahaiaren arabera, lanak kontzientzia eta izatea ditu ardatz. Gorputzari uko egin gabe, haragoko kezka eta gogoetetan sakontzeko gaitasuna erakusten duela azpimarratu du, orekari eutsiz eta hunkigarri izanez. Sen poetikoa eta egileak han-hemenka, omenaldi modura, erabili dituen erreferentziak ere nabarmendu dituzte epaimahaikideek.

Poesialdia egitarauaren baitan, gaur, martxoak 21, idazle gazteei zuzendutako Donostia Kultura Poesia Lehiaketaren bosgarren edizioaren sari banaketa egin da Udal Liburutegi Nagusiko Mandasko Dukearen aretoan. Aurtengo saritua Izaskun Igoa da (Ziga, 1995), Hotza bazkatzen poema bildumagatik.

2020an Igoak aipamen berezia lortu zuen Lurra zango zolaren gainean lanarekin, Iruñeko Udalak antolatutako Egile Berrientzako XXX. Euskarazko Literatur Lehiaketan. 2019az geroztik, Ttipi Ttapa aldizkarian aritzen da kolaboratzaile gisa.

Epaimahaikideen arabera, Hotza bazkatzen lanak kontzientzia eta izatea ditu ardatz. Gorputzari uko egin gabe, haragoko kezka eta gogoetetan sakontzeko gaitasuna erakusten duela azpimarratu du, orekari eutsiz eta hunkigarri izanez. Sen poetikoa eta egileak han-hemenka, omenaldi modura, erabili dituen erreferentziak ere nabarmendu dituzte epaimahaikideek.

Poesia lehiaketa honen sari ekonomikoa 1000 eurokoa da. Horretaz gain, Imanol Larrinagaren margolan bat oparitu zaio irabazleari eta Balea Zuria argitaletxeak saritutako idazlana argitaratuko du. Azkenik, ekainean egingo den Poesia eta Pentsamendua saioan Igoak bere poemak errezitatzeko aukera izango du.

Donostia Kultura Poesia Lehiaketa poesia zabaldu eta idazle gazteen lanari bultzada emateko asmoz sortu zuten Balea Zuria argitaletxeak eta Donostia Kulturak. 2018an, saria Esti Martinez Diaz de Ceriok irabazi zuen Azalberritze bat lanarekin. Bigarrena 2019an egin zen eta Gorka Salcesek eskuratu zuen Iraganaren izterrak obrarekin; finalista izandako Elena Olaveren Zeldak poema-liburua ere kaleratu zen. 2020an Lizar Begoñak lortu zuen Aro beilegia poema liburuarekin Donostia Kultura III. Poesia Lehiaketaren saria. Azkenik, 2021eko irabazlea Maialen Berasategi Catalan izan zen.

Zabaldu: