Erakusketak modu bisualean lantzen ditu gizakiek erabakiak hartu baino lehen izaten dituzten estimuluak eta prozesu mentalak. Maiatzaren 4ra arte egonen da ikusgai Ziudadelako Bolborategian.
Jaime Remirez de Ganuza eta Pablo Giobellina artista bisualek artelan fisikoak eta digitalak baliatzen dituzte, eta musika esperimental etereo eta errepikakorraz lagunduta, munduaz eta identitateaz hausnartzera gonbidatzen dituzte ikusleak. Plasta erakusketa Iruñeko Ziudadelako Bolborategian egongo da ikusgai, maiatzaren 4ra arte.
Artistek azaldu dutenez, “Plasta ikusmen bidezko ikerketa-proiektu bat da, eta egungo gizarte globalizatua hartzen du oinarri; izan ere, bizi garen mundua gero eta publikoagoa eta digitalagoa da”.
Erakusketak gizakien identitatea eraikitzeko prozesu mentalak gorpuzten ditu. “Prozesu estandarizatuen eta ausazko beste prozesu batzuen konbinazioa da, hala nola pertsonaren esentzia bera. Kapitalismoan hain ohikoa den serieko fabrikaziotik abiatuta, erakusketak irmoki azpimarratzen du pertsona bakoitzak bere burua definitzearen eta giza-identitatea taxutzearen beharra, betiere aldaketa, salbuespenak eta ausazkotasuna oinarri hartuta”. Hain zuzen, nahasketa hori lortzea da proiektuaren helburua.
Halaber, erakusketak gonbidapena egiten dio ikusleari autobehaketa eta alderaketa lantzeko eta estimuluei harrera egiteko, izatearen analisiaren eta definizioaren parte baitira, eta norberaren identitatea eta bakoitzak gizartean proiektatzen duen autokontzeptuaren muga lausotzeko balio baitu. Horretarako, erakusketako artelanak arlo fisikoaren eta digitalaren artean kulunkatzen dira, eta, musikaz lagunduta, ibilbide bat egiten dute modan, argazkilaritzan eta 3D errealitateetan barna.
Artistek, estimuluek ikusleengan sortzen dituzten barne-gatazken jakitun, osasun mentalari lotutako arriskuetan eta egungo harreman sozialen konplexutasunean jartzen dute arreta, eta gogoeta egitera gonbidatzen dute publikoa. Azken finean, ikusleen parte-hartzea sustatzeko asmoz, galdera erabakigarri honi erantzutea proposatzen dute: “errealitateetatik zein hartzen dugu egiatzat?”
Remirez de Ganuzak moda diseinuko ikasketak egin zituen, eta argazkilaritzan, bideoartean eta idazketan aritu da lanean hainbat urtez; gaur egun, lurralde jakin batean errotutako gizarte, kultura eta politikaren arloko proiektu bisualen ekoizpen artistikoan dihardu. Pablo Giobellina, berriz, arkitekturan graduduna da, eta 3Dko eta esparru digital, grafikoko lanak egiten ditu espazioko eta arkitekturako esplorazioen eta irudien bidez, eta gizarte- eta kultura-narratibetan oinarrituta.