Donostiako Poetika zikloak aurrera jarraituko du urteko azken hiruhilekoan, Koldo Mitxelena Kulturuneak urtero antolatzen dituen irakurketa poetikoak biltzen dituenak, Jon Obeso eta Jose Luis Padronen koordinazioarekin eta Musikeneren laguntzarekin. Oraingo honetan, datorren asteazkenean, abenduak 20, Apoaren itzala izeneko Poetika emanaldia izango da, Joseba Tapia musikari eta trikitilariarekin eta Gotzon Barandiaran poetarekin.
Bi artistak proiektu honetan elkartu dira Joseba Tapiaren abestietan zehar ibilbide literario bat egiteko, musikariak bakarka egindako ibilbidea errepasatuz, Apoaren edertasuna (Gaztelupeko Hotsak, 1998) izeneko diskotik abiatuta. Disko horrek sortzaile askorengan eragina izan zuela diote antolatzaileek, eta Koldo Izagirre idazlearen testuak eta Tapiaren konposizioak uztartzen zituen lehen lana izan zen.
Poetikaren barruan eskainiko duten emanaldiak musika saioa eta hitzaldi solasaldia izango ditu. Biak bakarrik ariko dira, Joseba Tapia trikitia eta ahotsarekin, eta Gotzon Barandiaran testuarekin. “Tresna xume eta soilen formatukoa, baina emaitza indartsua eta oso ezaguna emango duena”, adierazi du Donostia Kulturak
Literatura eta musika uztartzea dituen ikuskizuna arratsaldeko 19:30ean izango da, Donostiako Alde Zaharreko Santa Teresa komentuko Ekitaldi Aretoan.