Bilboko Kalealdiak bere 20. edizioa ospatuko du aurten, eta antolatzaileek aurreratu dutenez, “kalitate maila bikaina eta aniztasuna erakusten dituen programazioarekin egingo du”, izan ere, kaleko arte eszenikoen nazioarteko panoraman lehen mailan dauden zenbait konpainiaren proposamen berrienak bilduko ditu. Uztailaren 1etik 7ra 80 emanaldi izango dira. Horietako asko, Casilda Iturrizar Parkean izango dira. Aurtengo edizioan ere parkeak apainketa berezia izango du jaialdiari ongi etorria emateko. Bestalde, aurten sentimenen arabera bereizitako hiru gune izango ditu, jaiarekin, loreekin eta lasaitasunarekin lotutakoak. Kalealdia Alde Zaharraren inguruko ohiko kokalekuetara ere helduko da.
Edizio honetara gonbidatutako konpainien artean, hamar Euskal Herrikoak izango dira, gainerakoak Estatu espainia eta frantsesatik, Italiatik eta Danimarkatik datoz, batez ere. Guztiek ere euren azken lanak ekarriko dituzte Bilbora, eta ikus-entzuleek ohiko agertokietan gozatu ahal izango dituzte: parkean, astelehenetik asteazkenera, eta ostegunetik aurrera jaialdia Bilboko Areatza ingurura joango da, Plaza Barrira, Santiago Plazara eta Arriaga Antzokiaren kanpoaldera.
Euskal Herrian lehen aldiz ikusi ahal izango diren proposamenen artean bi azpimarratu ditu antolakuntzak. Alde batetik, Kataluniako Mumusic Circus zirku konpainiak Flou Papagayo ikuskizuna aurkeztuko du. Beste alde batetik, Defracto Cie frantsesen Flaque malabar ikuskizuna. Bertan, giza gorputzak beste dimentsio bat hartzen du, diziplinaren garapenerako funtsezko elementu gisa. Bi ikuskizun horiek uztailaren 2an eta 4an, Arriaga plazan, 22:30etik eta 23.00etatik aurrera aurkeztuko dira, hurrenez hurren.
Jaialdian egongo diren gainerako konpainien artean beste hainbat azpimarratu behar dira, duela hilabete Umore Azokan estreinatu zen Esencial zirku garaikide ikuskizuna aurkeztuko duen Andaluziako Vaivén Circo, besteak beste. Lan horretan eszenografiak oso leku garrantzitsua betetzen du, zirku teknika anitzak gauzatzeko aukera emanez. Beste alde batetik, Solfasirc taldeak Casilda Iturrizar parkean instalatuko du bere karpa, familia osoari zuzendutako Dékoncert ikuskizuna eskaintzeko.
Clown ikuskizunen artean Danimarkako Brunette Bros konpainiarena dago Circus ikuskizunarekin. Eszenografiaren parte gisa kamioi zahar bat erabiliz, publikoa miniaturazko antzerki ibiltarian eta zirkuan murgilduko dute. Konpaniak hiru emanaldi eskainiko ditu, Casilda Iturrizar parkean, 21:00etan, uztailaren 1, 2 eta 3an.
Hiru mundu
Parkea izango da, hain zuzen ere, edizio honetako erabateko estreinaldietako baten agertokia, Kalealdian aspalditik ezaguna den Mystérieuses Coiffures-en eskutik. Aurten sentimen ikuskizuna proposatuko du, leku horretarako berariaz diseinatutako fantasiazko unibertsoa. Hiru mundu egituratuko dira bertan, eta ikus-entzuleek bertatik ibiltzeko eta hunkitzeko aukera izango dute. Horrela, Casilda Iturrizar parketik dabiltzanek, dena kolorez beteta egongo den Jaiaren mundutik, ile-apaintzaile zoroak landare-orrazkerak egin eta sorkuntza tailerrak eskainiko dituen Loreen mundutik, eta, nahi dutenek, bertan gelditzeko, etzateko eta amets egiteko aukera izango duten Samurtasunaren, baretasunaren eta soseguaren mundutik.
Edizio honetako erabateko bigarren estreinaldia Teatro due mondi konpainia italiarraren Como crepe nei muri / Wall Cracks kale antzezlana izango da. Pieza horrek, harrien eta hesien bitartez egunero eraikitzen diren hormei eta mugei buruz mintzo da. Estreinaldia hilaren 7an izango da, 12:00etan, Areatzan.
Hirugarren estreinaldia ibilbide luzea duen Hortzmuga Teatroa Bilboko konpainiaren eskutik etorriko da. Amaiera emango dio edizio honi, uztailaren 7an, 13:30ean, Arriaga plazan, beste lan batzuek bezala migrazioen gaia lantzen duen Bidaia lan berriarekin. Oraingo honetan, Hortzmuga Teatroak gizarte gogoetarako tresna gisa erabiltzen du kaleko antzerkia. Herritarrak emanaldiaren parte izango dira, ekintzaren elementu aktibo gisa. Sorkuntza prozesuan jaso diren etorkinen eta errefuxiatuen bizipenetan eta kontakizunetan abiatuta, formatu bizia eta ikuskizuna eskainiko den leku bakoitzean desberdina sortuko da, gazteei eta helduei zuzenduta.
Hortzmuga Teatroaz gain, Bilboko Kalealdiaren edizio honek hainbat diziplina jorratzen dituzten beste bederatzi euskal konpainia ere izango ditu. Horien artean, [e.go] eskainiko duen Dikothomia. Konpainia hau zirku mota garaikideagoan espezializatuta dagoen euskal konpainia da, eta ikuskizun hori mazoari eskaintzen zaion omenaldia da, arte adierazpenerako zirkuko objektu gisa.
Beste proposamen azpimarragarri bat Deabru Beltzak taldearen eskutik etorriko da. Edizio honetan, perkusioa, sua eta piroteknia uztartzen dituen Symfeyny ikuskizun berria aurkeztuko dute. Ikus-entzuleekin topaketa eta elkarrekintza sustatzen duen pieza da. Lehenengo partea ibiltaria da, eta ondoren, agertoki gainean, sei musikari-piroteknikok sorkuntza lan berriari bizia emango diote, dardara eta soinua dituen eta irudietan eta koreografietan aberatsa den ikuskizunean. Uztailaren 5ean eta 6an ikusi ahal izango da, 23:30ean, Arriaga plazan.
Kalealdiaren edizio honetan arituko diren Euskal Herriko gainerako konpainiak hauek izango dira: Barsanti Cia, Malas Compañías, Markeliñe, Natxo Montero, Trakamatraka eta The Funes Troup, kaleko ikuskizunak, clowna, zirkua, dantza eskainiz, eta baita familia osoari zuzenduta dagoen eta musika-tresna guztiak birziklatutako materialekin eginda dauden musika esperientzia bat ere.