Guztira 12 konpainiaren 55 emanaldi izango dira, eta Nafarroako 29 herritan aurkeztuko dira: udaberrian 32 emanaldi, eta udazkenean 23.
Nafarroako Antzoki Sareak Sendaberri, Paisaia eszeniko berriak aurkeztu du, Nafarroako Gobernuko Kultura eta Kirol Departamentuarekin lankidetzan diseinatutako programa propioa. Nafarroako Antzoki Sarearen Zirkuituaren ordezkoa denez, bere bosgarren urtemugara iritsi da aurten. Horrekin batera, programazio osoa kontsultatzeko webgune bat jarri dute martxan (www.sendaberri.com).
Antolatzaileek azaldu dutenez, “Sendaberri hitz joko bat da, gaztelania eta euskara nahastuz, bide berriak esan nahi du”. Horixe da, hain zuzen ere, zikloaren helburu nagusia: “RTN-NASeko espazio eszenikoen ohiko programazioa aberastea eta osatzea, kontzientzia kritikoa sortzen duten ikuskizunen bidez. Ikuskizun horien programazioa, masa-publiko bati zuzenduta ez dagoenez, zailagoa izaten da”. Hala, aurtengo edizioan, “kalitate handiko antzerki, dantza eta zirkuko proposamen eszenikoak programatu dira, gizartea, genero-ikuspegia eta lengoaia eszeniko berriak jorratzen dituzten gaien inguruan sakontzeko”.
Egitaraua
Guztira 12 konpainiaren 55 emanaldi izango dira, eta Nafarroako 29 herritan aurkeztuko dira: udaberrian 32 emanaldi, eta udazkenean 23.
Nafarroako artisten proposamenen artean, Estefania de Paz Asinen Argako Erregina ikuskizuna dugu, berriki interpretazio onenaren Feten saria jaso duena; Iluna Producciones konpainiaren Con los ojos abiertos, Miguel Hernandez poetaren bizitzari eta bere pasioei buruzko antzezlana; El Rey Tuerto, Nafarroako Inextremis eta Tanttaka Teatroa konpainien koprodukzioa, komedia soziala da, kutsu politikoekin; Lucio, una revolución escénica, Yerbabuena Producciones-en diziplina anitzeko ikuskizuna, komikia, dokumentala, performancea eta musika uztartzen dituena, publikoari Lucio Urtubia gerturatzeko; El Patio Teatroren Conservando Memoria, Izaskun Fernandez nafarrak antzeztutako lana, aitona-amonei omenaldi poetikoa.
Dantza Dan-Zai konpainiaren Re-Des obraren eskutik etorriko da, sare sozialek gaur egungo gizartean duten eraginean sakontzen du ikuskizunak. Bestalde, iXa konpainiaren Aitzindariak obrak berdintasunaren aldeko borroka hasi zutenak omenduko ditu.
Nueveuno Zirku Konpainiak, bestalde, Suspension ikuskizuna eskainiko du, gizonen arteko harremanei eta identitate maskulinoaren krisiari buruzko ikuskizuna da.
Azkenik, Teatro en Vilo konpainiak Hoy puede ser mi gran noche ikuskizuna taularatuko du, kontakizun apurtzailea da, umore dosiekin. Aka Teatrok A.K.A. aurkeztuko du, eta, azkenik, La Dramatica Errante konpainiak bere azken lanak aurkeztuko ditu, Yerma eta Altsasu.
Jarduera paraleloak
Edizio honetan, emanaldi guztiekin batera, jarduera paraleloak egingo dira, hala nola, tailerrak, erakusketak eta topaketak.