Proiekzioak maiatzaren 8, 15 eta 22an izango dira eta ekainaren 16tik 30era bitartean, La Casonak argazki erakusketa bat hartuko du. Edizio honetan urpeko 700 argazki baino gehiago, 82 film labur eta 27 dokumental jaso dira, horietatik 17 film labur eta 3 dokumental aukeratu dira.
Aurten, lehen aldiz, Nazioarteko Itsaspeko Zinemaren zikloa (CIMASUB) antolatu dute Amurrion, ozeanoen edertasuna eta hauskortasuna zinema, argazkigintza eta itsaspeko artearen bidez erakusteko asmoz.
Lehen edizio hau maiatzaren 8an, 15ean eta 22an izango da, arratsaldeko 19:00etan, Amurrioko Antzokian. Bertan, egungo urpeko irudiaren film labur eta dokumental onenetako batzuk proiektatuko dira. Gainera, ekainaren 16tik 30era bitartean, argazki erakusketa bat paratuko dute La Casona – Liburutegian, goizez eta arratsaldez.
Zikloa 1975ean sortu zen itsasoarekiko maitasuna eta errespetua transmititzeko eta haren aberastasuna eta biodibertsitatea ezagutarazteko asmoz. “Zinema, argazkilaritza, kirola eta teknologia uztartzen dituen formatu erakargarri baten bidez, ziklo honek gure ozeanoek giza jardueraren ondorioz bizi duten egoera larriari buruzko kontzientzia sortu nahi du”, azaldu dute antolatzaileek.
Jarduera guztietarako sarrera doakoa izango da. “Aukera paregabea izango da itsas hondoaren magian murgildu eta haren kontserbazioari buruz hausnartzeko”.
Edizio honetan urpeko 700 argazki baino gehiago, 82 film labur eta 27 dokumental jaso dira, horietatik 17 film labur eta 3 dokumental aukeratu dira.