Donostiako San Telmo Museoak Basterretxearen unibertso sortzailearen zati bat bere bilduma iraunkorrarekin lotutako begirada baten bidez aztertzen duen erakusketa proposamen bat eskainiko du.
Nestor Basterretxearen jaiotzaren ehungarren urteurrenarekin (1924-2014) bat eginez, Donostiako San Telmo Museoak bere erakusketa iraunkorreko hainbat piezaren eta euskal artistaren obra esanguratsuen hautaketa baten arteko elkarrizketazko ibilbide bat eskainiko du. Miren Vadillok egin ditu proiektu honetako komisario lanak, eta 2024ko urriaren 4tik 2025eko urtarrilaren 26ra bitartean bisitatu ahal izango da.
Eskultoreak askotariko teknika eta diziplinatako artelanetan gauzatu zuen bere hurbileneko inguruarekiko zeukan interesa, eta arreta berezia jarri zuen, ezagutza- eta inspirazio-iturri gisa, euskal kulturaren adierazpen tradizionaletan, ohituretan eta sinesmenetan. Horregatik guztiagatik, objektuen arteko irakurketa interpretatiboa eta elkarlotua proposatzen da; horrek ahalbidetuko du euskal artistaren ezagutza aberastea eta museoak biltzen duen ondarea balioestea. Ibilbidea osatzeko hamabi pieza aukeratu dira, museoko erakusketa iraunkorrean zehar atal ezberdinetan txertatu direnak. Piezak honako lagatzaileek utzitakoak dira: Basterretxea Irurzun familia, Gipuzkoako Foru Aldundiko Gordailua , Gipuzkoako Batzar Nagusiak, Euskadiko Filmategia, Eusko Legebiltzarra, Eusko Alkartasuna (EA) eta Lazkaoko Beneditarren Fundazioa.
Proposamen honekin, San Telmo Museoak bat egin nahi izan du egile bermeotarraren ehungarren urteurrenaren harira antolatutako jarduerekin.
Vadilloren esanetan, “San Telmo Museoak erakusketa proposamen bat eskainiko du, Nestor Basterretxearen unibertso sortzailearen zati bat bere bilduma iraunkorrarekin lotutako begirada baten bidez aztertzen duena. Euskal sortzaileak euskal kulturaren inguruan egin zituen etengabeko erreferentziei eta azterketei esker, bere lan esanguratsuenetako batzuen eta museoan jasotako Euskal Herriaren historia eta tradizioa zeharkatzen duten objektuen eta espazioen inguruan azaleratzen diren ideia batzuen arteko elkarrizketa zintzoa ezar daiteke. Sortzaile bermeotarraren figura ospetsuari omenaldia egitea edo bere ibilbide luze eta polifazetikoaren ibilbidea egitea baino gehiago, bere sorkuntza-lanaren eta San Telmo Museoaren altxorraren arteko lotura batzuk antolatu eta nabarmendu nahi dira, Basterretxeak bere lan estetikoa Euskal Herriko antzinako kulturarekin identifikatzeko duen interesean oinarrituta, lengoaia garaikide eta moderno baten bidez.
Basterretxearen lan zabalean nabarmendu daitezkeen alderdi ugarietatik, funtsezko zutabeetako bat tradizioa eta modernitatea uztartzea da, euskal herriaren iragana ezagutzeko irrika erakutsiz eta bere lanarekin orainean eta etorkizunean proiektatuko zen ezagutza eta pentsamendua sortzeko tresna bat eskainiz.