(argazkia: Xabi Paya)

Nork-Nori-Nor trilogiaren bigarren atala aurkeztu dute Xabi Payak eta Patxi Gallegok

Nori saldu diote euskara batua? Izenpean dator eleberri grafikoa.

Bi urteko lanaren ostean eta oraingoan ere, umorea eta satira baliatuz, Nori eleberri grafikoa aurkeztu dute Xabi Paya bertsolariak eta Patxi Gallego marrazkilariak, Bilbon. Nork-Nori-Nor trilogiaren bigarren atala dugu komiki berria.

“Nori saldu diote euskara batua?”, Payak idatzi du komikiaren gidoia eta, azaldu duenez, Nori-ren abiapuntua TTIP akordio trasatlantikoan kokatzen da. “Gauza asko patentatzeko aukera zabaldu da, eta norbaitek Euskara Batua erosi eta patentatu du”. Amaia Ezpeldoi eta Damian Arruti detektibeek beraz, iraganera bidaiatu eta euskara batuari Creative Commons lizentzia jartzeko ardura izango dute.

Nork-Nori-Nor trilogiaren bigarren atala

2015ean kaleratu zuten Payak eta Gallegok Nork izeneko eleberri grafikoa, Bertsolari aldizkariaren 100. ale berezia aurkezteko. Aurreneko atal horretan ere, umorea eta satira erabili zuten genero beltzari jarraitzen zion istorioa kontatzeko.

Gallegok eta Payak komikia sortu zuten arren, Antxoka Agirre Bertsolari aldizkariaren zuzendariak marrazkilariari helarazi zion ideia 2013aren hasieran. Sortzaileak bertsolaritzaz ezer gutxi zekiela aitortuta, ezin izan zion Agirreri ezetzik esan eta Payarekin jarri zen harremanetan. Ia hiru urte eman zuten marrazkilariak eta bertsolariak lanean Nork argitaratu zuten arte. “Bertsolari aldizkarian ez genuen gure 25. urteurrena edozein modutan ospatu. Oso opari berezia egin genion geure buruari, geure irakurleei: Nork komikia”.

Konjurazio, konplot azpikeria, azpilan, azpijan, azpijoko, trikimailu, amarru eta jukutriaz mukuru betetako komiki bikaina erditu zutela diote Bertsolari aldizkarikoek. Andoni Egaña hiltzeko gai izan ziren, hiltzailearen identitatea agerian geratu zen azkeneko orrietan, “baina hein berean, irakurle finak nabarituko zuen amaiera irekia zela, hor ez zela ezer bukatu, eta bazela oraindik suspenserako tarte zabala”.

Nori Durangoko Azokan jarriko dute salgai eta abenduaren 6an eta 7an Landakon bertan izango dira egileak ere, “Bertsolari aldizkariaren standean izango gara Gallego eta biok aleak koplatzen eta marrazten!”, iragarri du Payak.

Zabaldu: