Goierri eskolako ikasleek sortutako proiektua da. Maketak trenzubia publiko anitzago bati ezagutzeko aukera emango dio oraindik aurrera. Izan ere, maketa hau ikusmen-urritasuna duten pertsonentzat dago pentsatua.
Ormaiztegiko Zumalakarregi Museoak pertsona guztien museorako sarbide osoa ziurtatzeko hobekuntza-planarekin jarraitzen du. Horren adibide da aurkeztu berri duen Ormaiztegiko trenzubiaren maketa irisgarria. Ordiziako Goierri eskolako ikasleek sortu dute Begiris elkartearen (Gipuzkoako itsu edo ikusmen urritasuna duten pertsonen inklusioa sustatzeko elkartea) aholkularitzarekin. Izan ere, maketa hau ikusmen-urritasuna duten pertsonentzat dago pentsatua, ukimenaren bidez nolakoa den jakin dezaten.
Monumentuari eta moduluari berari buruzko informazioa Braillen eta audio-deskribapena gehitzeaz gain (QR kodeen bidez lau hizkuntzatan eskura daitezke), informazio historikoa bi hizkuntzatan ere kontsulta daiteke irakurketa errazean, eta, horrela, pertsona guztiek errazago ulertu ahal izango dute historia.
Maketak plastikoa du material bakarra, 1/100 eskalan egina dago, 289 zentimetroko altuera eta 8 zentimetro sareta ditu. Gainera, 300 zentimetroko zabalera eta 40 zentimetroko sakonera duen oinarrian aurkezten da, eta bi elementurekin osatzen da, inguruneko proportzioaren eta tamainaren berri ematen dutenak: dagoen lurraren profila, Eztanda ibaiaren gainean dagoen bailara, eta desagertutako Ormaiztegiko bainuetxeari dagokion silueta, jatorrizko kokalekuan.