Uztailaren 17ko Osoko bilkuran jakingo da nork beteko duen Andres Iñigo euskaltzain emerituaren lekua.
Paskual Rekalde eta Paula Kasares nafarrak izango dira Andres Iñigo euskaltzain emerituaren hutsartea betetzeko proposatu diren hautagaiak. Otsailaren 28an, Bizkaiko foru jauregian egindako Osoko bilkuran zabaldu zen hautagaiak aurkezteko epea (legez, bi hilabetekoa izan behar zuena), Andres Iñigo emeritu izatera igaro zen unean bertan. Jakina denez, emeritu izateko 75 urte beteak izan behar dituzte euskaltzain osoek.
Baina epe hau luzatu egin behar izan da, martxoko eta apirileko Osoko bilkurak bertan behera geratu zirelako, pandemiak behartuta. Horretara, Akademiaren arautegiaren eta barne-erregelen arabera, uztailaren 17ko Osoko bilkuran egingo den bozketatik aterako da euskaltzain oso berriaren izena.
Akademiak gogoratu duenez, “Euskaltzain osoa izateko proposamena hiru euskaltzain osok izenpetu behar dute; eta, proposamenaz batera, zerrenda bat egin behar da, hautagai bakoitzak dituen merezimenduak xeheki aipatuz. Ondoren, euskaltzain osoek eta emerituek hautagaiak bozkatzeko aukera izaten dute”.
Hona hemen bi hautagaien profil laburrak:
Paskual Rekalde (Amaiur, 1963). Euskal Filologian lizentziaduna da EHUn, eta, gaur egun, Nafarroako Gobernuko euskara itzultzailea da eta Eusko Jaurlaritzako Terminologia batzorde bereziko kidea.
Zenbait lan eta artikulu argitaratu ditu euskara batuaren eta euskalkien eta Baztango euskararen inguruan. Horien artean daude Mariano Izeta zenaren Baztango Hiztegia eta Dirua galgarri lanen edizioa, eta Baztango, Malerrekako eta Bortzirietako agiri zaharretako zenbait toponimo eta oikonimoren inguruko lanak, Andres Iñigorekin batera prestatuak.
Euskaltzain urgazle 2003an izendatua eta Euskaltzaindiaren Nafarroako ordezkariorde, 2018an. 2000an hasi zuen ibilbidea Akademian, eta gaur egun zenbait batzorde eta lantaldetako kidea da. Orobat, HIZBEA zerbitzuaren arduraduna.
Paula Kasares (Iruñea, 1969). Soziolinguistika arloan garatu du ikasketa eta lan ibilbidea. Doktorea da eta graduak nahiz graduondoak euskal filologian, antropologian eta hizkuntza plangintzan burutu ditu.
Lan jarduna euskararen normalizazio teknikari lanetan hasi zuen 1994an. 2001etik 2003 bitartean Hizkuntz Eskubideen Behatokiko zuzendaria izan zen, eta egun Euskararen Nafar Institutuko Sustapenaren eta Plangintzaren Zerbitzuko zuzendaria da. NUPeko Giza eta Hezkuntza Zientzien Saileko irakasle ere dihardu.
Ikerketari dagokionez, soziolinguistika, hizkuntza eskubide eta hizkuntza antropologia alorretako hiru libururen eta hainbat artikuluren egilea da Kasares. Komunikazio eta hitzaldi ugari eman ditu Euskal Herriko nahiz atzerriko biltzar-mintegietan eta hondar hamarraldian; familian haurrak euskaldun haztearen gaineko hedapen eta sentsibilizazio jarduerei loturik ibili da. 2006tik euskaltzain urgazlea da.