Datozen hiru hilabeteetan, 50 proiekzio inguru ikusteko aukera egongo da. Ohi bezala, nazioarteko zientzialari ospetsuek egingo dituzte emanaldien aurkezpenak.
Euskadiko Filmategiak, Donostia International Physics Centerrek (DIPC) eta Donostiako Zinemaldiak Zinema eta Zientzia zikloaren bosgarren edizioa aurkeztu dute gaur Donostian. Datozen hiru hilabeteetan, 50 proiekzio inguru ikusteko aukera egongo da. Ohi bezala, nazioarteko zientzialari ospetsuek egingo dituzte emanaldien aurkezpenak, kultura zinematografikoa eta zientifikoa transmititzeko helburuarekin.
Emanaldiak Donostiako Tabakalera zentroan, Bilboko Arte Ederren Museoan eta Donibane Lohizuneko Le Select zineman izango dira. Gainera, aurten lehen aldiz, Gasteizko Artium museoa eta Iruñeako Golem-Baiona zinemak batuko dira ziklora.
Zikloaren aurkezpen ekitaldia Tabakaleran egin da, eta bertan, Joxean Fernandez Euskadiko Filmategiko zuzendariak azpimarratu du orain arte zientzia “funtsezkoa” izan dela eta, “gaur egun ere badela gure gizarteak aurrera egin dezan”. “Zientziari esker gure bizitzak hobeak eta luzeagoak dira, nahiz eta berehalako ziurtasun absoluturik ez eman beti”, gehitu du.
Ildo horretan, zientziaren kulturari ekarpena egin nahi dio programazio “eklektiko” honek. Esate baterako, sariek zientzian duten esanahiaz hausnartzen du El premio (Mark Robson, 1963) filmak, Zinema eta Zientziari urtarrilaren 13an, Artiumen, hasiera emango dion titulua. Pedro Miguel Etxenike fisikaria eta DIPCko presidentea izango da ekitaldiaren aurkezlea. Ondorengo egunetan, zientzialari nafarrak zinemaren klasiko hau zikloaren gainontzeko egoitzetan aurkeztuko du: urtarrilaren 14an Donostian, 15ean Bilbon eta 18an Iruñean.
Moby Dick (John Huston, 1956) eta Gorilas en la niebla (Michael Apted, 1988) klasikoek animalien mundua hurbilagotik ezagutzea proposatzen dute. Halaber, honako gai hauen inguruan eztabaidatu ahal izango da: historiaurrea En busca del fuego filmari esker (J. J. Annaud, 1981) eta minbizia Hope pelikulari esker (Maria Sødahl, 2019). Ikarie XB 1 (Jindrich Polák, 1963) eta Contact (Robert Zemeckis, 1997) lanek espazio-ikerketa jorratzen dute; Origen (Christopher Nolan, 2010) eta Deabruaren hazia (Donald Cammell, 1977) filmek, berriz, neurozientziara eta adimen artifizialera hurbilduko gaituzte. Azkenik, Traje zuriko gizona (Alexander Mackendrick, 1951) klasikoa ere proiektatuko da, fisika eta materialen kimika arloak lantzen dituena.
Aurkezpenak eta solasaldiak zientzialari entzutetsuek egingo dituzte: Arantza Acha, Juan Ignacio Perez, Joana Vitorica eta Ana Zubiaga biologoek; Javier Aizpurua, Raul Angulo, Naiara Barrado-Izagirre, Silvia Bonoli, Aitzol Garcia, Aran Garcia-Lekue, Marcos Pellejero eta Santiago Perez-Hoyos fisikariek; Fernando Cossio, Xabier Lopez eta Jon Mattin Matxain kimikariek; Olatz Arbelaitz eta Elena Lazkano informatikari eta adimen artifizialean adituek; Maria A. Blasco bióloga molekularrak; Maria Jose Iriarte arkeologoak; Karmele Llano albaitariak; Sara Manzano biokimikariak; Maria Martion-Torres medikuak eta paleoantropologoak, eta Valentina Rodriguez kazetari zientifikoak.
PROIEKZIO BEREZIAK ETA IKASLEENTZAT
Gasteizera, Donostiara eta Bilbora hurbiltzen direnek 2021eko Kimuak katalogoko film-laburren proiekzioez gozatzeko aukera ere izango dute. Gainera, Gipuzkoako Zientzia eta Teknologia Parkean (Donostia) Picture a Scientist (Ian Cheney eta Sharon Shattuck, 2020) filma emango da Emakumeak Zientzian proiektuaren baitan (Gipuzkoako ingurune zientifikoko 17 erakundek osatzen duten aliantza).
Era berean, Apolo 11 (Todd Douglas Miller, 2019) filma ikusteko aukera izango dute ikasleek goizeko emanaldietan Tabakaleran, Artiumen eta Arte Ederren museoan.
Sarrerak Tabakalerako, Artium eta Arte Ederretako museoetako eta Le Select eta Golem-Baiona zinemetako webguneetan eta leihatiletan erosi ahal izango dira.