AEKk bereziki eskertu du omenaldia, jaialdi hau “euskal musikaz, giro onean, eroso, aske eta euskaraz aritzeko gunea” delako.
Zeidfest Gaztea festibalak AEK omenduko du larunbatean, apirilak 5, Barakaldoko BECen, egun osoz ospatuko den jaialdian. Hori dela eta, AEKren esku egongo da aurtengo irekiera ekitaldia, eraikineko sarrera nagusian goizeko 11:00etan hasiko dena.
Ateak irekitzean, bertan bildutako lagun guztiak Kittu elektrotxarangaren konpainian sartuko dira BECen, laugarren pabiloiraino. Txarteldegiaren parean egongo da jaialdia inauguratzeko moztu beharreko zinta, eta han egingo diete ongietorria AEKren Nazio Kontseiluko kide Lurdes Etxezarretari eta Barakaldoko AEKko zuzendari Argiñe Sangradorri. Hitzalditxo labur baten ostean, Sangradorrek zinta moztu eta ofizialki hasiko da festibala.
Aize Otaño AEKren Nazio Kontseiluko kideak adierazi duenez, “guretzat plazer eta ohore handi bat da, Jaizkibel konpainiaren eta Naizen Elkartearen lekukoa hartuta, jaialdiaren omenaldia jasotzea eta ate irekiera ekitaldian parte hartzea”.
Jakina denez, AEKren xedea da Euskal Herriko biztanle guztiak euskaraz eroso bizitzea; “horregatik aritzen gara Euskal Herri osoan euskararen ezagutzan, erabileran eta sustapenean. Euskal herritarrek euskara eroso erabiltzeko baldintzak izatea nahi dugu, eta eginkizun horretan dihardugu buru-belarri euskaltegietan, gure berbalagun eta mintzalagun egitasmoetan, eta abar. Azken finean, gure ikasleak euskaltegietatik ateratzean gure hizkuntza arlo guztietan erabiltzeko aukera izatea bilatzen dugu: lagunartean, familian, lanean, aisialdian… eta Zeidfest Gaztea jaialdiak horretarako aukera ematen du. Beraz, Zeidfest Gaztea euskal musikaz, giro onean, eroso, aske eta euskaraz aritzeko gune horietako bat denez, gure irakasle, ikasle, berbalagun eta AEKide guztiei euskaraz eroso bizitzeko gune hori aprobetxatzera dei egiten diegu”, gaineratu du Otañok.
Gero eta arnasgune gehiago
Etxezarretak bere aldetik, omenaldia AEKko euskaltegietan egunero euskara ikasten ari diren milaka euskara-ikasleentzat izatea nahi dutela adierazi du, “Oskorriren Euskaldunberriaren balada kantaren letrak dioen bezala, goizero, goizero AEKn bezero, batzuetan ero, besteetan bero dabiltzan horientzat guztientzat”.
Jaialdia Barakaldoko BECen izango denez, “bereziki aipatu gura ditugu Barakaldon, Ezkerralde osoan eta, Ezkerraldean bezala, Euskal Herriko gunerik erdaldunenetan euskara ikasten ari diren ikasleak; euskaraz eroso bizitzeko guneak sortzea hain erraza ez den lekuetan horiek sortzen ari direnak. Ezkerraldeko gure lau euskaltegietan (Santurtzi, Portugalete, Sestao eta Barakaldo), esaterako, mila ikasle inguru dabiltza euskara ikasten, eta 500 bat berbalagun kalean euskara praktikatzen”, nabarmendu du Etxezarretak. “Sarri egiten dugu berba euskararen arnasguneei buruz; bada, zorionez, horien guztien ahaleginari esker, gero eta ohikoagoa da Bilbon, Ezkerraldean, Arabar Errioxan, Erriberan edo Enkarterrin arnasguneak topatzea, alegia, euskaraz eroso bizitzeko guneez gozatzea”, amaitu du.