Bihar abiatuko da bosgarren eta azken zikloa Gasteizen, ostiralean Donostian eta larunbatean Bilbon. Film hauetako bat proiektatuko da: 20.000 especies de abejas (Estibaliz Urresola, 2023); Nina (Andrea Jaurrieta, 2024); Arima (Jaione Camborda, 2019); Un otoño sin Berlin (Lara Izagirre, 2015); Paradise Hills (Alice Waddington, 2019).
Euskal emakume zinemagileak zikloaren bosgarren eta azken edizioak zuzendari gazteenen (hots, 80ko eta 90eko hamarkadetan jaiotakoak) hamabi film programatuko ditu apiriletik ekainera bitartean. Horrela, Euskadiko Filmategiak 2021ean abiarazi zuen proiektu bat itxiko da. Proiektu horren bitartez, euskal zinemaren egoera “modu erabakigarrian” eraldatzen lagundu duten 50 zuzendari baino gehiagoren lana aitortu nahi izan da bost urte hauetan. Hortaz, gutxienez film luze bat egin duen zuzendari orok aukeratu du bere filmografiako zein film proiektatu nahi zuen. Aurten, lehen aldiz, fikziozko lanen kopuruak ia dokumentalena berdindu du.
Donostiako Tabakalera zentroan egin dute gaur goizean prentsaurrekoa eta bertan bost zikloetako batean parte hartu duten hogei zuzendari baino gehiago izan dira: Mireia Gabilondo, Mirentxu Purroy, Ione Hernandez, Yolanda Mazkiaran, Rosa Zufia edota Helena Bengoetxea izan dira horietako batzuk. Joxean Fernandez Euskadiko Filmategiaren zuzendariak adierazi duenez, ziklo honek hiru helburu izan ditu: “Euskal emakume zinemagileen talentua Filmategiaren pantailetan erakustea, eurek aurkeztea beren lanak eta hitz egitea publikoarekin, eta, horrekin guztiarekin batera, ikerketa akademiko bat egitea haien historiari eta haien filmografiaren garapenari buruz (Cineastas vascas, Maria Pilar Rodriguezek koordinatua)”.
Bihar, apirilak 3, abiatuko da zikloa Gasteizen; apirilaren 4an Donostian; eta apirilaren 5ean Bilbon. Film hauetako bat proiektatuko da: 20.000 especies de abejas (Estibaliz Urresola, 2023); Nina (Andrea Jaurrieta, 2024); Arima (Jaione Camborda, 2019); Un otoño sin Berlin (Lara Izagirre, 2015); Paradise Hills (Alice Waddington, 2019).
Dokumental gehienek fikzioaren berezko baliabideak ere erabiltzen dituzte. Hona hemen dokumentaletako batzuk: Enero (Ione Atenea, 2019); Polaris (Ainara Vera, 2022); Young & Beautiful (Marina, Lameiro 2018) ; Pizti bat, agian (Ainhoa Gutierrez del Pozo, Olatz Gonzalez Abrisketa, 2023); Las letras de Jordi (Maider Fernandez Iriarte, 2019); A los libros y a las mujeres canto (Maria Elorza, 2022); eta Arduraz komunika dezagun (Aitziber Zapirain, 2021).
Zuzendari gehienek Gasteizen, Donostian eta Bilbon aurkeztuko dituzte filmak, eta Artium Museoaren, Tabakaleraren eta Arte Ederren Bilboko Museoaren leihatiletan eta webguneetan eskuratu ahal izango dira sarrerak.
Saio berezia
Hiruhileko honetako programazioari amaiera emateko, saio berezi bat egingo da: Aukera programa osatzen duten sei film laburrak proiektatuko dira. Zinemaren munduan lehen urratsak egin nahi dituzten emakumeei zuzendutako mentoretza-ekimen bat da Aukera programa. Hauek ere ikusi ahal izango dira ekainaren 17an Artium Museoan eta ekainaren 24an Tabakaleran: Hemen bizi da maitasuna (Ainhoa Olaso, Enara Garcia, 2022), Prioridades (Tamara Lucarini, 2023), Hadas (Beatriz de Silva, 2023), Komando Marmitako (Uxue Botas, Ane Nafarrate, 2024), Pomo d’oro (Nerea Sciarra, 2024) eta Azkena (Ane Ines Landeta, Lorea Lyons, 2024).