Sarrerak abenduaren 19tik aurrera egongo dira salgai.
Gainean da urte berria, eta harekin batera iritsiko da bertsozaleen urteko lehen hitzordu nagusienetako bat: Bertso Eguna. Azken urteotan egindako bideari jarraituz, lurraldez aldatu eta Gernika-Lumon hartuko du lur egitasmoak.
Urtarrilaren 27an izango da hitzordua, eta Bertsozale Elkartea egun osoko plana ari da antolatzen. “Goizean lurralde ezberdinetako bertso-eskolekin bertso poteoa egingo dugu. Ondoren, bazkaria izango da Astran, eta haren segidan egingo da eguneko saio nagusia tokian bertan. Ondoren, festan jarraitu nahi duenak ere izango du aukera”, aurreratu dute.
Abenduaren 19an jarriko dira sarrerak salgai bertsosarrerak.eus atarian, eta orduan emango dituzte xehetasun gehiago.
Bertsolari Egunetik Bertso Egunera
1968an hasi zen antolatzen gaur egungo Bertso Egunaren aitzindaria. Hasiera batean, Bertsolari Eguna izena hartu zuen, eta garaiko hainbat bertsolariren omenaldi eguna izaten zen. 1987an Bertsozale Elkarteak hartu zuen antolatzeko ardura. 1995ean omenaldi kutsua alde batera utzi eta bestelako itxura hartu zuen egunak; izena ere aldatu zitzaion, eta Bertso Eguna izatera pasa zen.
Donostian egin zen urte luzez, eta 2017ko etenaren ondotik eta 2018tik aurrera, Euskal Herri osoan mugitzen den egitasmo ibiltaria da egun, Bertsozale Elkartearen oinarrizko helburuekin bat eginez: herrialde osoan eragitea. “Pandemiak eraginda 2021ean eta 2022an data eta egiteko modua aldatu baziren ere, Bertso Egunak egin ahal izan genituen, eta aurten egun osoko plana antolatzeari ekin genion berriro ere”, adierazi dute elkarteko kideek.