Akademiakideek Azken etxea eta Desertuan behatxuloa lanen artean hautatu behar izango dute sariduna.

2022. urteko 111 Akademiaren Saria nori eman erabakitzeko 111 Akademiak hirugarren eta azken bozketa txanda martxan jarri berri du. Arantxa Urretabizkaia idazlearen Azken etxea, Nerea Ibarzabalen Bar Gloria, Anjel Lertxundiren Desertuan behatxuloa, Aingeru Epaltzaren Erretzaile damutuen konpainia eta Maddi Ane Txoperenaren Ez erran inori izan dira lehian bigarren txandan, lehenengo bueltan boto gehien jaso zuten bost obrak, alegia.

Bigarren buelta honetan, saridun izendatzeko beharrezkoa den botoen % 40 lortu duen lanik ez da izan eta, beraz, boto gehien jaso duten bi obrak aurtengo finalera igaro dira: Arantxa Urretabizkaiaren Azken etxea eta Anjel Lertxundiren Desertuan behatxuloa.

Dena ondo bidean, Akademiak apirilaren amaieran emango du ezagutzera 2022ko 111 Akademiaren Saria.