Naroa Jauregizuria Ahize-AEK-ko aholkulariak hiriguneko gazteek euskararen eta euskarazko kulturaren inguruan duten pertzepzioa ikertu eta #Damolat proiektua abiatu du. Ikastolen Elkartea unitate didaktikoa diseinatzen ari da.
Bilbo Handiko gazteek euskararen eta euskarazko kulturaren inguruan dituzten iritziak, asoziazioak edo jarrerak ezagutzeko, ikerketa egin du Ahize-AEK hizkuntza aholkularitzak. Horretarako, pasa den urteko hasieratik aurtengo udaberrira arte interbentzioak egin dira Bilboko, Portugaleteko eta Getxoko ikastetxeetan eta bertatik jasotako materialarekin #Damolat unitate didaktikoa osatu dute Ikastolen Elkartearekin elkarlanean. Gaur goizean aurkeztu dute proiektua Xabier Arauzo Bizkaiko Aldundiko Euskara zuzendariak, Koldo Tellitu Ikastolen Elkarteko lehendakariak eta Naroa Jauregizuria Ahize-AEK-ko teknikari eta proiektuaren gidariak.
Unitate didaktikoaren lanketa amaitzen ari da Ikastolen Elkartea, eta datozen asteetan egingo da bere hedapena. Hori baino lehen, ordea, Barakaldoko Minas ikastetxean pilotajea egingo dute Ahize-AEK-ko teknikariek, eta azkenik, euskararen zein euskarazko kulturaren hedapenean lan egiten duten eragileen esku jarriko da doan. Hau da, irakasleen, kultur teknikarien, programatzaileen, begiraleen edo kultur elkarteetako kideen esku, besteak beste.
Azaldu dutenez, “ikas unitateak euskarazko kulturaren transmisiorako eta berrartikulaziorako hainbat jarraibide eta ariketa jasoko ditu, oinarri argi batekin: gazteek eurek bilatu ditzaten euskarazko euren erreferenteak”.
#Damolat proiektuaren berri eman dute gaur, baina unitate didaktikoaren aurkezpen ekitaldi nagusia abenduaren 2an egingo da, Barakaldon antolatuko den Igo Bolumena! jardunaldian. Arlo ugaritako profesional eta adituen parte hartzea izango da bertan, baina gazteei eurei ere ahotsa emango zaie.
Proiektuaren asmoetako bat hori izan baita hasieratik: “euskararen eta euskarazko kulturaren transmisioan gazteek aktiboki parte hartu dezaten”.
Proiektuaren jatorria
#Damolat egitasmoaren ernamuinean kezka bat egon da, azken urteetan gero eta ageriago dagoena: “Bizkaiko, Gipuzkoako eta Arabako gazte gehienek euskaraz dakite, baina hizkuntzaren erabilera ez da maila berean areagotzen ari. Ez hori bakarrik, ingurune ez euskaldunetako hiriguneetan bizi diren gazteek euskarazko kulturarekin duten harremana txikia da. Transmisioaren funtzioa ikastetxeek betetzen dute kasurik gehienetan, baina eremu horretan ere herren dabiltza askotan. Izan ere, ikastetxeetan haurrek euskarazko erreferente ugari badauzkate ere (Irrien Lagunak, Ene Kantak, Goazen, marrazki bizidunak), ez da gauza bera gertatzen nerabeekin. Euskaratik aparte bilatzen dituzte euren erreferente kulturalak, eta egoera hori aldatzen saiatzeko ahalegina da #Damolat”, adierazi dute.
Adinean aurrera egin ahala, ikastetxeetako transmisio sareak indarra galtzen duela ondorioztatu du ikerketan Jauregizuriak: “Euskarazko mundutik jasotzen diren erreferentziak ikusezin, arrotz eta, neurri batean, deseroso ere bihurtzen dira, nahiz eta gazte gehienak euskal komunitateko parte sentitzen diren, eta hizkuntza eta kulturarekiko lotura emozionala mantentzen duten”. Teknikariak argi azaldu du eremu horietako gazteak izango direla euskararen etorkizuna bermatuko dutenak: “Egun euskarak aurrera egingo badu, hori hala izango da euskaradun gehien pilatzen den hiri eremuek bere lekua hartu dutelako. Eta horretarako, halabeharrez, eremu horretan garatzeko funtzionala izan beharko du euskarak: mundua interpretatzeko, ohiko beharrizanak asetzeko, bizipenak sortzeko, komunikatzeko, komunitatea sortzeko…”. Bide horretan ekarpena egin nahi du #Damolat proiektuak.