Irailaren 10etik 13ra, jaialdiaren laugarren edizioak askotariko soinuak uztartuko ditu Miramar Jauregian, Easo Plazan eta Dabadaba aretoan.
Udazkenaren atarian, Boga Boga Festibala bueltan izango da Donostian, hiriko gune ezberdinetan musika zabaldu eta proposamen garaikideak hiritarrengana hurbiltzeko asmoz. Aurten ere, jaialdiak estilo eta izaera ezberdineko artistak bilduko ditu, entzuleari ibilbide musikal anitza eskainiz.
Jaialdiaren ardatz nagusia Miramar Jauregiko lorategietan kokatuko da. Irailaren 11n, ostirala, Alice Phoebe Lou, Bodega, Mursego, Rachid B, Cervatana eta Llucia Pla igoko dira oholtzara. Hurrengo egunean, larunbata, Sebastien Tellier, Merina Gris, Myd, Ana Roxanne, Rubio eta Alai izango dira protagonistak gune berean.
Miramarreko eskaintzaz gain, jaialdiak hiriko beste txoko batzuk ere hartuko ditu. Easo Plazan, esaterako, doako kontzertuak izango dira irailaren 10etik 13ra, Marte Lasarte, Rüdiger, Labar, Remei de ca la fresca, Zeatikez, Juan Tatorri, Julia Sabate, Kulata, Barrrk, Mala Gestion, Gailu, Yung Prado, Julia Sabate eta Lorea Argarate talde eta bakarlarien eskutik.
Musika esperientzia osatzeko, Miramarren ardo naturalen eta gazta artisauen gunea egongo da, eta antolakuntzak jasangarritasun-neurri zorrotzak mantenduko ditu jaialdiaren egunerokoan.
Sarrerak
Miramar Jauregirako sarrerak jada salgai daude Boga Boga Festibala webgune ofizialean. Hauek dira aurtengo prezioak: Eguneko sarrera 35 euro, jaialdiko bonua 60 euro. Easo Plazako kontzertuak, esan bezala, doakoak izango dira.