Musikak, literaturak eta zaintzaren inguruko gogoetek harilkatzen dute Irurtzungo idazlearen azken lana.
Nerea Baldak Donostian aurkeztu du Zure arnasa zaintzeko eleberria, Erein argitaletxearen eskutik. Irurtzungo idazleak zaintzaren inguruko hausnarketak eta ama-alaba harremanaren tentsioak jarri ditu erdigunean musikaz eta literaturaz bustitako kontakizun honetan.
Eleberriko protagonista liburuzain bat da; urteak zaintzari eskaini ondoren lanera itzuli da, eta alaba nerabearekin duen harreman gatazkatsuak markatzen du haren egunerokoa. Baldaren hitzetan, “zaintzak dakarren zaurgarritasuna, nekea eta kontraesana ekarri nahi izan ditut lehen planora, bai eta zainduak izateko dugun beharra ere”.
Literatura eta musika
Protagonistak liburutegian ezagutzen duen emakume batekin, Alizerekin, sortzen duen harremana liburuen eta musikaren bidez eraikitzen da neurri handi batean. Eleberrian aipatzen diren liburuak literatura unibertsaleko lanak dira, gaur egun euskaraz irakur daitezkeenak, eta kanten bidez ere elkarrizketa moduko bat sortzen da pertsonaien artean.
Idazleak azaldu duenez, amatasunaren inguruko tailerrak gidatu ondoren eta zaintzaren inguruko greba feministaren testuinguruan hasi zen nobela hau idazten. Giro horrek guztiak piztu omen zuen kontakizunaren abiapuntua. Balda zaurgarritasunaz eta erresilientziaz mintzo da eleberrian, baina batez ere eguneroko bizitzan askotan ikusezin bihurtzen diren zaintza egoerak ekarri nahi izan ditu argitara.
Musikari dagokionez, idazleak aitortu du zenbait kanta “soinu banda” modura izan dituela idazketa prozesuan. Horien artean dago liburuaren izenburua bera: Zure arnasa zaintzeko, Gorka Urbizuren Janela bat abestiko esaldi batetik hartua.
You may also like
