Ikus-entzunezko proiektuak garatzeko egonaldi-programan izena emateko epea irailaren 1era arte egongo da zabalik. Donostia Zinemaldiak, Tabakalerak eta Elias Querejeta Zine Eskolak sustatutako ekimenak tokiko eta nazioarteko zinemagileei zuzendutako garapen-programa eskainiko du beste urte batez.
Ikusmira Berriak ikus-entzunezko proiektuak garatzeko egonaldi-programa martxan da. Donostiako Zinemaldiak, Tabakalera Kultura Garaikidearen Nazioarteko Zentroak eta Elias Querejeta Zine Eskolak (EQZE) antolatzen duten ekimenak zinemagileei beren proiektuak garatzeko espazioa, aholkularitza eta nazioarteko proiekzioa eskaintzen dizkie.
Deialdia irailaren 1era arte egongo da zabalik, eta Euskal Herriko zein nazioarteko zinemagileek aurkeztu ahal izango dituzte beren proposamenak. Horrez gain, Zinemaldiko Nest sailean parte hartu duten sortzaileek eta EQZEko ikasleek ere izena eman ahal izango dute. Hautatutako proiektuak 2027ko urtarrilean jakinaraziko dira.
Programak zortzi asteko egonaldia eskaintzen du, bi fasetan banatuta. Lehenengoan, 2027ko martxotik apirilera bitartean, hautatutako zinemagileek sei aste emango dituzte Tabakalerako Zine eta Ikus-entzunezko Laborategian, Donostian. Bertan, adituen batzorde baten aholkularitza jasoko dute, baita diziplina anitzeko tutoretzak ere, proiektu bakoitzaren beharretara egokituta. Gainera, EQZEren prestakuntza-programako baliabideak erabiltzeko aukera izango dute.
Bigarren fasea Zinemaldiaren garaian egingo da. Irailean, parte-hartzaileak bi astez itzuliko dira Donostiara, ordurako garatuago izango dituzten proiektuak zinema-industriako profesional eta ordezkariei aurkezteko. Bien arteko aldian, maiatzetik irailera, online tutoretzak jasoko dituzte eta laguntza ekonomikoa izango dute proiektuen garapenean lanean jarraitzeko.
2015ean abiatu zenetik, Ikusmira Berriak programak 62 ikus-entzunezko proiektu garatzen lagundu ditu. Horietatik 28 nazioarteko zinema-jaialdietan estreinatu dira, hainbat sari eskuratuz, eta beste hainbat garapen-fasean edo estreinatzeke daude.
Azken urteotan programak nazioarteko presentzia nabarmena sendotu du. Besteak beste, Diego Cespedesen La misteriosa mirada del flamenco filmak Canneseko Un Certain Regard saileko Film Onenaren Saria eta Gazteriaren Saria irabazi ditu; Ana Cristina Barraganen Hiedra lanak Veneziako zinema-jaialdian Gidoi Onenaren Saria eta Donostian Aipamen Berezia jaso ditu; Jaume Claret Muxarten Estrany Riuk Reykjavikeko Film Onenaren Saria eta Veneziako Ekarpen Artistiko Onenaren Urrezko Bisatoa eskuratu ditu; eta Irati Gorostidi Agirretxeren Aro berriak Donostia Zinemaldiko New Directors sailean epaimahaiaren Aipamen Berezia jaso zuen.
Ikusmira Berriak programaren helburua da sortzaileei beren proiektuak garatzeko baliabideak eskaintzea, nazioarteko sare profesionalekin harremanak sustatzea eta etorkizuneko zinema-lanak sendotzeko laguntza ematea. Programan parte hartu nahi dutenek irailaren 1era arte izango dute izena emateko aukera.