Agirrek eta Eskisabelek Susa argitaletxearen Lisipe bildumaren baitan kaleratu dute Trikua esnatu da izeneko saiakera. Bertan, euskalgintzaren eta feminismoaren arteko gurutzaketa eta aliantzarako bidea arakatzen dute.
“Euskalgintzak eta feminismoak bat egiten dute geuregan, geure gorputzetan, geure eguneroko praktiketan, geure bizipenetan, geure erresistentzietan, geure militantzietan euskaldun eta emakume garen heinean, eta hortik euskaltzale eta feminista izateko eman dugun urratsean”, dio Lorea Agirre kazetari eta Jakin aldizkariko zuzendariak. Esaldi horrek ondo borobiltzen du Idurre Eskisabel idazle eta kazetariarekin batera ondu duen Trikua esnatu da izeneko saiakeraren muina.
Egileen arabera, gaur eta hemen emakume izatea eta euskaldun izatea bazterreko izateko bide dira oraindik. “Prestigioaren, pribilegioen eta eskubideen banaketak osatzen duen jendarteko botere sarean jokoan daude euskararen normalizazioa eta genero berdintasuna”. Biak menderakuntzaren alaba direla diote Eskisabelek eta Agirrek, eta, horregatik, “biak dira indibidualki zein kolektiboki ahalduntzeko eta boteretzeko lekuak, zein jendarte berdinzale eta bizigarriago baten alde eragiteko guneak”.
Gainera, baieztatu dutenez, “hizkuntza eta generoa gurutzatu egiten direla badakigu, hizkuntz hautuak genero eraikuntzatik igarotzen direla eta alderantziz”. Horrenbestez, euskalgintzaren eta feminismoaren arteko gurutzaketa eta aliantzarako bidea arakatzen da liburu honetan.
Eskisabelek eta Agirrek fokatze berri bat eskaintzen dute liburu honetan, “itzalean zeuden eremu horiek ikusgarri jartzeko saioa dela dio Jule Goikoetxeak liburuan idatzi duen hitzaurrean. Egileek gonbita egiten digute, alde batetik, euskalgintzaren kontzeptu eta praktika tradizionalen inguruko eztabaida irekia bultzatzeko eta horien eraginkortasunaz mintzatzeko; eta beste aldetik, tresna analitiko eta esperientzia estetiko eta etiko-politiko berriei bidea zabaltzeko. Goikoetxearen arabera, “feminismoaren korronteak eta praktikak euskalgintzan txertatzearen aldeko apustua dakar liburuak, subordinatzea eta menderatzea euskaraz ere egin daiteke eta”.