Gasteizko musikariak Irlandako doinuetara garamatza oraingo honetan, bertako jende, pub eta tradizioetara. Diskoaren aurkezpen kontzertua, bihar, hilak 12, izango da Gasteizko Ur Biltegian.
Iñaki Palacios (Gasteiz, 1988) txistulariaren musika ibilbidea sendotzen doa poliki-poliki. Txistua jotzeaz harago doan musika egitea gustuko du, eta halaxe sortu ditu orain arte argitaratutako diskoak ere. 2017an sartu zen aurrenekoz estudio batera, Lurra, ardoa, dantza lehen diskoa grabatzeko. 2019an berriz, Harria diskoa plazaratu eta Iñaki Perurena eta Mulixka dantza taldearekin batera ikuskizun berezia taularatu zuen.
Baltik (Baga Biga) izeneko disko berriarekin, berriz, Irlandako doinuetara garamatza, bertako jende, pub eta tradizioetara, baina dena Europa iparraldean nagusi den ikuspegi musikal eklektiko batetik abiatuta. Txistulariak azaldu duenez, Baltik Irlandan erabiltzen den esamolde bat da eguraldi meteorologikoa txarra denean, hau da, hotz handia, euri etengabea eta haize jelatua, dena batera dagoenean. Musikalki, ordea, “Baltik diskoak ez du erakusten hoztasunik, ongi babestu da txistuaren zolitasuna, eta ez bakarrik ondoan dituen tresnekin, baita erakutsi nahi duen bi herrialdeen nortasun eta ezaugarri musikalekin, biak batuta; euskal eta zelta moldagarritasunak uztartuta, senidetuta”.
Hirugarren disko hau The Gael’s taldearekin sortu du, eta nabarmendu duenez, lanak ez du aurreko biekin zerikusirik, nahiz eta euskal musika tradizionala presente dagoen oraingoan ere.
Diskoak biltzen dituen bederatzi kantuak txistulariarenak dira, Step ahead izan ezik, Eskoziako Ali Levack-ena da azken hau. Palaciosek hainbat musikari izan ditu alboak lan berria ontzeko, horien artean daude: AMAK taldeko Alaitz Telletxea, Maixa Lizarribar, Amaia Oreja eta Kris Solano Baltik abestian; Goiatz Dutto That boot is for me kantan eta Alan Dogherty We’ll toast together again abestian.
Diskoaren aurkezpen kontzertua, bihar, hilak 12, izango da Gasteizko Ur Biltegian.
You may also like
