Informazioaren anabasaren garaian, Agustin Arrieta filosofo eta idazleak filosofiaren ezinbesteko zeregina aldarrikatzen du argitaratu berri duen Manifestu Filosofikoa saiakeran. Gaurkotasunez betea eta manifestu-izaera argia uztartuz, egileak egia eta justizia bezalako balioen defentsa ausarta egiten du Alberdania argitaletxearen eskutik kaleratu duen lanean.
Aritz Galarraga editorearen arabera, liburu honetan Arrietak “berriro ere filosofiaren zentzua eta balioa ekarri ditu lehen lerrora. Aspalditik euskal pentsamenduaren ahots argi eta zorrotzenetako bat den autoreak liburu honetan gogoeta sendo baina irakurterraza proposatzen du, filosofiak gaur egungo gizarte konplexuan izan dezakeen eginkizunaz”.
Arrieta ezaguna da bere dibulgazio lanagatik. “Euskal Herriko Unibertsitateko filosofia irakasle izateak, zalantzarik gabe, lagunduko zion pentsamenduaren diziplina hori publiko zabalago bati hurbiltzen”, dio editoreak. Izan ere, urte luzez saiatu da filosofia akademiaren esparrutik atera eta gizartean presente egon dadin. Horren erakusgarri dira aurretik argitaratutako hainbat lan, besteak beste Alberdania etxeko Zerberri sailean argitaraturako Sinesmenak eta usteak (2010), zentzu komunaren aldeko aldarri dena, edota erreferentzia bihurtu den Zertaz dihardu filosofiak? (2002).
Manifestu filosofikoa liburuak aurreko lan horien ildoa jarraitzen du, baina, honetan, manifestu forma eman dio testuari, bere printzipioak eta asmoak modu argian plazaratuz.
Saiakerak helburu bikoitza du: alde batetik, filosofiak gaur egungo gizartean izan dezakeen eginkizuna zehaztea; bestetik, irakurlea konbentzitzea diziplina horren premiaz. “Informazioaren eta ustezko ezagutzaren tsunamiaren garaian, non datu, iritzi eta zarata ugariren artean orientatzea gero eta zailagoa den, Arrietak galdera nagusi bat planteatzen du: zertarako balio du filosofiak gaur? Liburuak galdera horri erantzun pausatua ematen dio, pentsamendu kritikoa anabasaren eta konplexutasunaren aurrean ezinbesteko tresna dela defendatuz”, nabarmendu Galarragak. “Manifestu filosofikoa ez da soilik gogoeta teoriko bat. Autorearen konpromisoaren adierazpena ere bada: filosofiak gizarteari zer eskaini diezaiokeen azaltzeko eta irakurlea pentsamenduaren praktikarekin berriro konektatzeko gonbidapena da”.
You may also like
